Minette Brink

 
 

...En my kollegas dink ek is vol draadwerk
 

 
 
EN op die gevorderde ouderdom van vier en dertig kry die uwe op 28 April om 11:00, ja, wag daarvoor, DRADE.
O, ek is so opgewonde daaroor ek kan met stiletto's aan wawiele in Nelson Mandela af maak. Of in die besemkas gaan sit en bitterlik aan de ween gaan oor hierdie beker wat my nie wil verby nie.
Die tandeman s ek het te veel tand en te min been. My onderkaak is blykbaar net twee sentimeter lank en my bokaak vyf en negentig. Ek het derhalwe 'n lieflike marmotagtige overbite en my voortande is besig om geleidelik nader aan mekaar te kruip sodat ek binnekort soos Liewe Heksie gaan lyk met een reuse-voortand. 'n Geval van meer bek as binnegoed.
Die vreeslike grappiges in die kantoor vermoed dat dit onnodige prosedures en geldmors is aangesien ek klaar te vol draadwerk isha-haek lag nie.
Ek gaan ook nooit weer glimlag nie.
Ek gaan nooit weer 'n tjoppie kan kou dat die bene kraak nie.
Toffies is uit en versappers is in.
Groen blaargroentes is uit want dit sal lyk of ek 'n amfibiese diertjie vermink het met al die stukkies groen wat so aan die tandbedrading rondswaai.
Ja, dis 'n naarheid.
Ek gaan geskaafde binnewange h en sjthnaaksjth praat met al die staalkonstruksies om die gebit.
Na twee jaar gaan die drade glo afkom en dan, die Grand Finale.
Tandman sal gewapen wees met sy tandsaag en boor waarmee ek, hopelik onder volle verdowing met back-up drugs, uitmekaar gesny gaan word en die ou stukkie onderkaak langer gerek gaan word.
Moet onder geen omstandighede dink dat die operasie vir kosmetiese doeleindes is nie. Geen mens sal so masochisties wees om haarself hierdie leed aan te doen net ter wille van die beter lyk nie. Die rede is doodeenvoudig dat my tande al hoe verder vorentoe skuif en dat ek hulle moet keer voordat almal gelyk, soos klein lakentjies op miniatuur balkonnetjies, oor my lippe begin hang. As jy mooi daaroor dink, sal jy saamstem dat dit uiters onprakties sal wees, veral as ek in die openbaar moet eet. Ek doen dit dus vir almal om my, nie vir myself nie.
Maar nou begin ek wonder. Aangesien ek my so moet martel vir so lank, is hierdie nie dalk die geleentheid waarop ek sedert die jongste se geboorte wag nie? Die tyd het aangebreek om m-a-e-r te word. En hier word ek sommer 'n hupstoot gegee met die aan- en toeklamping van kakebene. Hoe wil jy nou vinniger die rolletjies afskud? Vir twee jaar gaan ek net dit wat deur 'n strooitjie kan pas, inneem.
Dink net, teen Junie 2005 gaan ek 'n stunner wees met 'n langer kakebeen en 'n model se lyfie.
Miskien moet ek die hele pakket neem. Wanneer die drade afkom, moet die manne met die lasers naderstaan en sommer alles wat hang en flap oplig, weg-laser, smelt en verstel. Teen daai tyd is Botox al ou nuus en baie goedkoper en kan ek met 'n verslapte voorkop loop wat nooit ooit weer in 'n verwoede frons kan toeklap nie.
Ter afsluiting, goue sonstrepies in die hare en 'n splinternuwe klerekas.
Ek kan nie wag nie.
Net een ou kluuiinn probleempie: sal iemand asseblief vir my N$250 000 stuur?
Die mediese fonds maak darem 'n N$50 bydrae tot die drade