Minette Brink
Sport en politiek
Met alle respek gesê en uit die diepte van my hart.
Vervang politiek met sport. Dis al hoe wêreldvrede gevestig kan word.
Voor almal nou weer hulle oë rol en ag ja “whatever”, vroumens, sug, dink eers.
Vergelyk ʼn bietjie die aantal mense wat dag na dag na sportuitsendings kyk met dié wat politieke debatte volg.
Hoeveel mense ken jy wat die wekker vir skuins na middernag stel om tog NET NIE die openingsrede van die Verenigde Nasies se Veiligsraad te mis nie?
Hoeveel mense slaap vir dae in die gietende reën voor regeringsgeboue om “ringside seats” tydens die opening van die parlement te kry?
Wie het ʼn ondertekende fotoplakkaat van al die kabinetslede teen sy of haar kamermuur?
WIE het al ʼn doktersbrief ‘bekook’ om weke ‘afgeboek’ te wees net sodat jy die President se besoek aan China kan volg? In China. Nie op TV nie.
Politiek lok skares om verwarrende redes. Politiek is ʼn ongesonde sport waarvan min die reëls ken en volg. Dis nou waar daar wel reëls in plek is. Politiek is die duurste sport in die wêreld met in die meeste gevalle, belonings vir eie gewin. Politiek roem om ʼn spansport sonder vergelyk te wees, maar is selde indien ooit.
Politici inspireer nie sommer met kleurvolle uitrustings, neon-sonskerm, punt innie wind hare en “funky” sonbrille nie. (Nou goed, ek moet erken ons het wel ʼn minister of twee wat die stylding met oorgawe doen.)
En dan is daar die troefkaart: kaalnaelers.
Ek kan my nie indink dat iemand kaalbas agter ʼn “MP” in die hoofstraat gaan afhol en dieselfde gewaardeerde impak as ʼn bleekboud Bok-ondersteuner oor Nuweland sal hê nie.
Inteendeel. Die “honourable member” én sy “ondersteuner” sal tien teen een met gesperde neusvleuels in geskokte stilte verafsku word. En in die koerant lees dat die gewaardeerde lid stil-stil bevorder is. Drimiopsis toe. As bokwagter.
En dink net die reaksie as nartjies vol vodka oor die Parlementsvloer moet vlieg na ʼn nare optrede. Of iemand uit blydskap die Mexican Wave tussen die gewyde mure moet begin. En wanneer laas het ʼn bierbrouery die nasie laat “rock” met ʼn hiper-cool advertensieveldtog oor aand-parlementsittings.
Okei, okei, ek ruk nou hande uit. Grappies op ʼn stokkie. Ek vra verskoning indien dit mag voorkom dat ek geen respek het vir ons landsleiers nie. Dit is nie die geval nie.
Ek wil net probeer om bietjie woema in die andersoortige spansport te gee. Politiek het nou een maal nié die oemf van ʼn nasionale sokker-oorwinning in die verre nie, of die aardskuddende impak van ʼn Wêreldbekereindstryd nie.
Is maar net oor al daai lipgimnastiek dat u so ʼn beperkte kykertal het.
“Howzat!”
