Minette Brink

 
 

Banke
 

 
 
HOEKOM het banke sulke belaglike ‘besigheidsure’? Hulle maak oop teen die tyd wanneer ander normale werkers reeds ‘n halfuur by die werk is en dan sluit hulle weer ‘n hele negentig minute voordat jy uitklok.
Tussen een en twee wanneer die meeste arbeiders hulle rekeninge betaal, finansies uitsorteer en in rye gaan staan, sal daar NOOIT meer as drie tellers in die glaskaste wees nie. En jy moet mooi kyk want dié drie het ook die nare gewoonte om stil-stil te verdwyn. Dit alles geskied terwyl jy vir die sewende keer kyk na ou Leon Schuster-flieks, dierevideos of Boesmans wat briewe oor die Namib aandraf. En moenie vergeet van die Asem agter jou wat geen aanvoeling vir persoonlike ruimtes het nie en later met sy lippe teen jou agterkop staan nie.
Sodra ‘n manlike teller genadiglik weer sy verskyning maak, moet jy bid dat daar nie ‘n aanvallige jong meisie voor jou in die ry is nie, want die transaksie sal aansienlik langer duur omdat daar geflirt sal word en gegiggel sal word totdat Meisie haar telefoonnommer met ‘n skaam giggeltjie oor die toonbank gestoot het. Ten spyte van die feit dat al haar gegewens op die rekenaarskerm voor meneer Teller staan en sy van agter in die ry al vir hom kon skree ‘Ek gee jou toestemming om my persoonlike inligting te misbruik!’
Ek bekla my lot teenoor die enigste teller in Windhoek wat ook ‘n sielkundige is. Toe wys sy vir my haar payslip en ek verloor tydelik die gebruik van spraak. Dis vermetel om die minste te sę. Geen wonder die tellers verdwyn sporadies nie -- om stilletjies te gaan huil oor hul soldy of eerder die gebrek daaraan.
Ook dié dat die meeste van hulle nooit oorloop van borrelende entoesiasme nie.
Die bank is ook baie vinnig op jou spoor as jy twee en dertig dollars in die rooi is en sal jou onmiddellik ontbied om die bestuurder te kom sien. Wat gaan hulle doen as ek die dag bel en sę ek sien ek is nou vyftig dollars in krediet en sal die bankbestuurder my asseblief dadelik kom sien?
Verduidelik dan sommer die buitensporige ‘bankkoste’ waarvoor ek aanspreeklik gehou word.
Ek vat klaar die kans om my geldjies in jou instelling se onbekende hande te plaas, nou moet ek nog betaal vir die voorreg. En dis duurder om geld oor die toonbank te trek as by die masjien buite wat in elk geval permanent buite werking is. Hoekom?
Hoe groter die bedrag wat jy trek, hoe groter die adminfooi daarop. Is dit omdat die bondels note swaarder raak en die tellers fisies uitgeput word of straf die bank jou omdat jy dit waag om jou geld uit hul beleggingsplannetjies te onttrek?
En dan die tjekdebakel. Ek weet dis om veiligheidsredes dat tjeks moet ‘lę’, maar vir sewe dae? (Ekskuus, werksdae.) Vele studente het al omgekom van honger as gevolg van hierdie simpel vereistes. En wat gebeur terwyl die tjek nou so rustig lę? Daar is of geld in die rekening of nie. Watter verskil maak die sewe dae? As die bank om die een of ander rede onraad vermoed, bel net die betrokke partye en sę dat die tjek vir ‘n dag of twee onder kruisverhoor geplaas gaan word en tot verdere kennisgewing in aanhouding is.
Waarlik, so kan dit nie aangaan nie.
En die bliktrommeltjie-onder-die-bed is ook nie ‘n uitweg nie, want deesdae is jy nie seker wanneer Bed en Bliktrommel onder jou uitgedra word nie.
Waar’s daai Grandpa’s…