Welkom aan alle nuwe intekenare!

Soos julle hierbo kan sien is dit uitgawe nommer 100! Sjoe, was nogal 'n lang pad tot hier, dankie aan almal wat uitgehou het tot nou, waardeer dit baie. Ek gaan 'n hele klomp goed weggee so maak seker dat julle alles lees om nie van die pasellas te mis nie.

Ek het sommer die Patriot se baadjie so effens verander en eenvoudiger gemaak, hoop dit lees nou makliker.

Soos verlede keer belowe gaan dit sommer 'n lekkerlees uitgawe wee hierdie. Nie net skryf Estelle de Bruyn weer vir ons nie, maar die ou gunsteling, Minette Brink is weer terug spesiaal vir nommer 100 en dan is daar ook nuweling (hier altans) , Annelie Botes.

Kom ons skop oudergewoonte af met Estelle se bydrae. Sy is verbonde aan die Republikein, die enigste Afrikaanse dagblad in Namibië. Kontak haar gerus, sy hoor graag van julle.

MA SE VERJAARSDAG
Estelle de Bruyn

TANNIE Bokkie het vroegtydig laat weet. "Willemien, vanjaar doen jy niks, ons treat jou." Anders as ander jare is die eetkamertafel dus dolleeg toe ek op die vooraand van my Ma se 80ste verjaarsdag by haar huis kom. Dis net die Royal Albert teestel, die bont teestel wat sy toe hulle pas getroud was van my pa persent gekry het en die wit en groen teestel wat op die tafel uitgepak is.
Vrydagoggend tien uur toe gaan die ark se deure behoorlik oop en op ’n streep kom die tannies daar aan met verjaarsdagwense, persentjies en elk met die een of ander eetding. Dis melktert en peppermint crisp tert, jodetert en aspersietert, koeksusters en karameltertjies, krimpvarkies en gevulde poffertjies.
Hulle is almal daar, al die tannies wat so getrou elke jaar kom geluk sê. Tannies wat mekaar oor jare by die VLU, die sustersvereniging en met die gewerkery by die kerrie en rys tafel by die skool se atletiekbyeenkomste en oor meer as 30 jaar elke Sondag in die kerk leer ken het. Hulle kuier in paaiemente en soos die eerste sarsie groet, lui die voordeurklokkie en die volgende golf spoel in. Dominies Andries kom ook geluk sê, eet twee keer van die tannies se gebak tot groot vreugde van teenwoordiges. Tannie Lina, wat ’n paar jaar terug agter haar kinders aan Alberton toe getrek het, se dogter het haar spesiaal vir die dag deurgebring om te kom meemaak aan die vieringe. Tannie Anna het van Klerksdorp gery en vir haar kry jy nie stil as sy eers op dreef is nie. Sy vertel weer, soos verlede jaar, van haar hartaanval "en die dokters kan tot vandag toe nie uitvind wat fout is nie, maar ek is seker dit was ’n hartaanval" en van elke oorsese reis wat sy sedert 1955 onderneem het, hoe sy in Napels verdwaal het in die huurkarretjie en hoe hulle met die ferrie oor die fjords in Noorweë gereis het, die Amerikaanse vrou met die geil stem wat haar op die een toer in Griekeland so geïrriteer het. En nes verlede jaar luister almal maar aandagtig en maak of dit die eerste keer is wat hulle die stories hoor, want op dié ouderdom weet hulle is dit maar moeilik om ’n gehoor te kry om te luister.
Laat middag kom Oom Johan en Tannie Stienie ’n draai maak. Hulle het verlede jaar die huis waar hulle 40 jaar lank gebly het verkoop en ’n plekkie in ’n aftreeoord gekoop. Hulle kan nie uitgepraat raak oor hoe lekker dit is nie. Die ou groot kasarm van ’n huis mis hulle glad nie, nie vir ’n oomblik nie, maar al die goed wat in bokse gepak is met die trek, is nog nie uitgepak nie. "Willemien, jy moet jou huis opgee. Vir wat wil jy hier in die grote huis aanbly. Kom aftreeoord toe," sê hulle.
Toe ons uiteindelik donkeraand die voordeur toetrek toe die laaste mense weg is, sug ek en my Ma ’n slaak van verligting. So ’n 80-wordery kan ’n mens uitput. Ons was die skottelgoed, bêre die oorblywende koek en tert, trek ons pajamas aan en val stokflou in die sitkamerstoele neer vir nabetragting.
"Ek bly net hier waar ek is, tot ek nie meer langer kans sien vir die groot huis en die groot tuin nie," sê my Ma.
Dis reg met my, Mamma. Solank jy wil en kan, geniet jou huis en jou goedjies. As jy dan nie langer kans sien nie, maak ons twee ’n plan. Volgende jaar, as die Here wil, hou ons weer verjaarsdag daar om die groot eetkamertafel.

Dankie, Estelle, ek kan sommer sien hoe kuier die oumense! - Peter

En nou is dit Minette se beurt. 'n Ou gunsteling hier op Peterjasie, het ek haar oorreed om spesiaal vir die 100ste uitgawe weer iets te skryf, hier is dit:

Minette het dit nie 'n titel gegee nie, maar die Word dokument waarin sy dit gestuur het was Peter.doc, so dit is wat ek dit noem.......

Peter.doc
Minette Brink

Richard Bach sê “There’s no such place as far away.”
Maak daarmee wat jy wil. Vir my het die woorde verbysterend te veel betekenis. Dit skeur my hart toe ek die 2de Mei met die rooi karretjie oor die Oranjerivier ry. En die Namib met al sy geheime en my droomman agterlaat. Oor ek moes, oor Vader Tyd so gesê het. En ek doelloos op Stellenposh ronddwaal op soek na ‘n stukkie sand, ‘n stukkie mens-mens wat na son ruik.
Dit slaan my wind uit toe my beste pêl laat weet sy het daardie droom-job in Madrid gekry en Vrydagaand hou ons vaarwel-party.
Toe my pa destyds met sy rugsak by die huis uit is om nooit weer terug te kom nie, het ek nog nie vir Richard Bach geken nie. Ook nie toe ons kleintyd van die Kaap Suidwes toe getrek het en ek betraand my geliefde Ouma en Oupa Brink in die agterruit van die Volla sien kleiner raak nie.
Van mense wat weggaan weet ek te veel. Doodgaan, skei, sommer net wegloop, emigreer, noem maar op. En al wat jy wou doen is om almal vir wie jy so oneindig lief is, aan jou vas te maak om saam met jou deur die lewe te reis. Soos daardie volksbekende moskombersie.
Maar dis helaas nie hoe die lewe aanmekaar geweef is nie.
Dis jy, alleenlik jy. En skielik is jy vry, sing nog ‘n bekende.
Dis presies hoe die steke langs mekaar lê.
Dan eers maak oom Bach se woorde sin.
Maar jou oge moet eers oopskiet om die grote wêreld in jou hand te kom laat lê. Of in my geval, onder die getokkel van die klawerbord. Want Corby se baba Rachel is gisteraand Down Under gebore en somehow is sy verlange terug PE toe skielik minder, en Derrick se tuinbou-besigheid in Brisbane floreer die afgelope maande, kyk die stunning foto’s.
Mel en John het huis gekóóp in Glasgow en die kids praat Afrikaans met Skotse aksente, “wens jy kan dit hoor”, Francois het die acting eers eenkant geskuif en ‘kook’ in London met die ‘graphics’ – ek is flou, girl, ma’ ek kla nie, die Liebe Vader is goed vir my’ en iewers in oorloggeteisterde Afrika neem Kenneth steeds onverpoosd foto’s met die hoop dat iemand iewers eendag die lig in hul harte sal voel.
En uit die bloute bliep die selfoon en dis sommer net ‘n lawwe boodskappie van Jay in Kanada wat seg “al wat great is vir hierdie dag.” En jy het nie regtig ‘n idee wie hy is, maar somehow ken ons mekaar almal en jou hart sit uit van lekkerkry.
Oorlat jy skielik weet, dis my familie dié. Die mense vir wie jy nog nie in die oog gekyk het, wie se reuk jy nie ken nie, saam met wie jy nog nie oor ‘n Namib-duin is nie. Maar dit maak nie saak nie.
My pa het na hy uit die huis weg is, een verjaarsdag vir my ‘n boek van Richard Bach gepos. Jare later het ek ‘n baie besondere man ontmoet. Sy naam was Peter Thomas. En hy het my wind uitgeslaan met herinneringe aan en die waarde van: There’s no such place as far away.

Minette, ek sien uit na die tyd wanneer jy jou voete in die Bos gevind het en weer meer gereeld sal kan skryf....-Peter
 

Skitterdrie of bitter drie?
Annelie Botes

In my kinddae was daar onverwarbare patriarge en matriarge. My pa het beswaarlik sy eie koffie geroer, laat staan nog take soos wasgoed ophang en babas droogmaak.
My ma het nie ‘n tjekboek of bestuurderslisensie gehad nie. Sy het ons kerkrokkies en -hoedens gestik en gestysel; my pa het ons met sy Chev-bakkie Uniondale se koshuis toe gery en ons van sakgeld voorsien, ‘n sjieling per week. As ons gaan grootkoop het op George, het my pa bestuur en die tjeks uitgeskryf. My ma het die padkosfrikkadelle gemaak en ons hare gevleg. Die rolle was ononderhandelbaar.
Nou se dae is dit gat-oor-kop. Net nou die dag sien ek die bultende vrou op die voorblad van die koerant, in volle spoed op pad doellyn toe, rugbybal onder die arm. Glo ‘n skitterdrie gedruk. Die beeld van die stormvrou het aanmekaar boontoe geskiet in my kop, nes ‘n knoffelwind.
En die insident van my doerietydse standerd 6-seun het na my bly terugkom. Het mos in ‘n mayonnaisebottel ‘n wind gelaat en die deksel blitsig opgeskroef. Vandag, 14 jaar later, staan die ingelegde poep steeds uitgestal in sy kamer. My dogter was 3 toe sy haar eerste winter-broekiekouse gekry het. Toe stamp haar wilde nefie haar van die fiets af, en haar ontsteltenis was eg vrou: Jy kon my kouse geskeur het!
Laat ek die deegstukke saamknie. Pa-ma-triarge. Vroumensrugby. Ingelegde winde. Broekiekouse. Waarop dit neerkom, is dat ‘n vrou ‘n vrou is, en ‘n man ‘n man. Elkeen het ‘n unieke ratkas wat kan strip as die ratte onkundig opgewetter word.
Ek is ‘n moderne vrou wat glo in my regte, dit wyebek verkondig én uitleef. Maar iets in my vrouehart sê dit is verkeerd; die grense en rolle het verstrik geraak en dat ons saamgestelde rente opdok vir ‘n oortrokke fasiliteit wat buite ons vermoëns lê. Dié dat ons met ‘n ontgogelde middeljarige mansgeslag sit. Nie almal nie, maar vele van hulle. Verkeerd? Lees gerus Archibald D. Hart se Unmasking Male Depression om insig te kry.
Wat is dit met ons mans dat hulle aanmekaar verkeerde kant toe neuk? Kinder- en oumensverkragtings. Gesinsmoorde. Kuberseks. Bloedskande. Perlemoendiewe. Motorsindikate. Tronke vol mans.
Die grootste probleem met mans is ontsaglike verwarring. In hulle kinderjare het hulle rolmodelle gehad wie se grense sekuur afgepen was. Nou is alles anders. Hulle kan nie meer vir hul gesinne voorsien soos hulle pa’s gedoen het nie. Hulle vrouens móét werk om die huisvuur aan die brand te hou, anders as die rolmodel met die tjekboek wat hulle geken het; of die sorgdraende ma wat gebak, gestop, gevoed, genees en gebaar het. Dan moet hy nog smiddae ná werk en naweke stofsuier stoot, kombuisvloer mop, resepteboeke lees. Hy moet ‘n voorskoot aansit en tafel dek. Dus, behalwe dat hy nie geldelik bemagtig is nie, word hy ingewors in die stropende rol van skropvrou en nanny.
Dis sielsknersend. Maar wat anders? Hy moet, want sy topvrou werk voldag om die vuur waarvoor hy aanspreeklik is, brand te hou. Sy’s rats en ingelig, het ‘n meestersgraad; haar eie motor, kredietkaart en off-shore-beleggings. Ken ‘n skroewedraaier en kragboor en bobbejaan-spanner. Sy kan ‘n kortbroek aantrek en ‘n skitterdrie druk. Ja, die patriarg het getuimel. En die matriarg staan wydsbeen bo-oor hom; jodelend, met haar brandende bra in haar hand.
Pleks dat almal lank en gelukkig lewe in ‘n wêreld vol regte, gelykhede en bevryding, versplinter die gesinstruktuur ál verder. Almal - mans en vroue - lewe op anti-depressante; almal het ‘n shrink. Slim ontleders sê dis stres en gejaag en geraas wat dit doen. Konstante druk. In my domheid dink ek dis omdat matriarg en patriarg omgeruil het, en nou gryp-gryp elkeen na ‘n identiteit wat onder die brug deur is see toe.
Vir elke skitterdrie wat die vrou agter die doellyn plant, seil die patriarg dieper in sy wegkruipgrot in. Tot in die dik donkertes waar die onheile skuil. Hy’s bang vir terugkruip en regopstaan in die daglig wat by die grotmond inskyn. Netnou steek die son hom in die helder dag. Hy ys vir die dag as die vroulike vaskop hom in die grond in druk en sy nek breek. En die hele skrum inmekaarsak.
Skitterdrie? Of bitter drie?

Al kommentaar wat ek het oor die drie artikels hierbo is: DIS mos nou hoe Afrikaans geskryf moet word!
 

Webwerf Soeklig

Met elke uitgawe fokus ek op 'n Afrikaanse webwerf.

Kry die Internet in Afrikaans

Klik gerus hier , en deursoek meer as 1400 Afrikaanse webwerwe - Soekafrikaans.co.za

Soek-Afrikaans.co.za, die suster webwerf van Woes.co.za word nou aangedryf deur Google. Jy kan nou iets soek oor die meer as 1,400 webwerwe wat gelys is. 'n Perfekte ding as jy 'n onderwerp in Afrikaans wil navors. Besoek gerus www.Soek-Afrikaans.co.za of as jy weet van 'n oulike Afrikaanse webwerf las dit sommer self by.

 

Afrikaanse Lied

Iemand wat in Melbourne woonagtig is stuur vir my nou die dag die skakel na 'n webwerf wat Afrikaanse midi's op het asook die woorde van 'n hele klomp Afrikaanse volksliedere. Johann Lochner, die eienaar van die webwerf verleen toe goedgunstiglik toestemming dat ek van die woorde vir my nuusbrief kan gebruik. As julle self wil gaan kyk,klik op die skakel:
Ons Blêrkas van Afrikaanse Volksmusiek

HORLOSIE IN DIE SAK

Woorde: Tradisioneel
Musiek: S.A. Volkswysie; verwerk: CHRIS LAMPRECHT

Horlosie in die sak en die ketting om die nek;
daarom is die nooiens na Ferreira so gek.
Ek swaai jou hier, ek swaai jou daar, jy's 'n ongenooide gas.
Ek swaai jou hier, ek swaai jou daar, jy's 'n ongenooide gas.
(O hartlam is dit jy,) Is dit jy, (o hartlam, is dit jy,)
is dit jy, o hartlam, is dit jy wat die kêrels so verlei?
(O hartlam is dit jy,) Is dit jy, (o hartlam, is dit jy,)
is dit jy, o hartlam, is dit jy wat so ver in die wêreld bly?
 

Agterpad Reisnotas - versamel deur Braham van Zyl

Ek luister mos een Saterdagoggend na Amoré Bekker op RSG waar sy 'n onderhoud voer met Braham van Zyl. Ek kontak hom toe en is nou op sy poslys, hier volg een van sy vertellings. Kontak hom gerus en vra om op sy poslys te kom. (Eposdres onderaan die artikel) Hy stuur 'n 'n gereelde nubrief uit.

DIE KAMIESBERGE, Namakwaland: Noord-Kaap Provinsie

Emmerentia de Kock van die Namakwa Nasionale Park, skryf:
Die Kamiesberg strek vanaf Garies tot by Springbok. Dit vorm die plato tussen die Sandveld aan die Weskus en Boesmanland in die ooste, en strek soos ‘n ruggraat in die middel van Namakwaland af. Dit word die Hardeveld genoem.
Dit is geleë in die middel van die Sukkulente Karoo plantegroeistreek, en word beskou as ‘n baie belangrike brandpunt in die plantegroeiwêreld. Die Kamiesberg is die enigste streek waar al die bekende endemiese vetplantspesies tot dieselfde familie behoort, nl. Mesembryanthemaceae. Die streek spog ook met meer as 4000 veldblom- en plantsoorte, waarvan 86 spesies endemies is, m.a.w. dit kom nêrens anders in die wêreld voor nie. Bo-op die berg kom fynbos en renosterbosveld voor. Die area spog met 35 boomsoorte wat oorblyfsels is uit ‘n nat tropiese tydperk miljoene jare gelede. Die Acacia erioloba, die kameeldoringboom, het die area eers 4000 jaar gelede binnegekom, en is eintlik ‘n somerreënval spesie.
Algemeen word aanvaar dat die naam, Kamiesberg, afgelei is van die Nama woord, tkimmie wat bondel beteken of tkammie wat water beteken: die berg van water wat opmekaar gestapel of gebondel lê. Die bekendste bakens in hierdie bergreeks is Kardoukop of Kroonkop suidoos van Kamieskroon, Boesmankop in die weste en Sneeukop, 1591 m hoog, noordoos van Kamieskroon.
In die winter kry die berge gereeld sneeu wat al vir skouspelagtige sneeutonele gesorg het. Die Kamiesberg bied wonderlike rotsformasies, plantegroei, klowe, passe en na aan die aarde mense, om dwarsdeur die jaar, en nie net gedurende blommetyd, te ontdek en te ontmoet nie.
Skakel die Namakwa Nasionale Park by 027 672-1843/948 vir meer inligting oor die omgewing daar om Kamieskroon.

Deur: deur Braham van Zyl
Posbus 1259, Durbanville, 7551
Faks 021-975-4466
Sel 082-457-0019

Skryf vir Braham en vra om op sy poslys geplaas te word en ontvang sy reisbeskrywings direk van hom af! e-pos : info@explore-sa.com

Luister elke Saterdagoggend net na die agtuur nuus op die Afrikaanse radiodiens van RSG na Braham van Zyl en Amoré Bekker se agterpad geselsies op die program Brêkvis met Bekker.

Hoe oud moet iets wees om as Toeka te kwalifiseer? Die volgende artikel dateer uit 1958 in die dae toe ek 'as n laaitie in Koster grootgeword het. Die volgende is deur my ma, Esther Anderhold, geskryf onder die skuilnaam Fien

Die volgende artikel deur Fien verskyn op 14 Mei, 1958 in die Koster en Swartruggens Herout

Die Kappiekommando Kompeteer
deur Fien
Die dames van Koster besluit toe mos om 'n rewolwerklub te begin

Gewapen met veldkykers, selfvertroue en tien patroontjies elk het die dames van die Kosterrewolwerklub verlede Vrydagmiddag op die skietterrein van die Noordelike Skietkommando bymekaargekom vir hulle eerste skietoefening, maar dit was nie lank daarna of die verbygangers het lont geruik en gou-gou was daar 'n groot skare mense wat gekom het vir, soos hulle vermoed, 'n braaivleis, (want die skietterrein is 'n deel van ons dorpskamp). Hier moes ons egter die belangstellendes teleurstel want die nodige voorsorgmaatreëls ter beveiliging van die lewende hawe in die kamp was alreeds getref - dus het daar geen moontlikheid van 'n braaivleis bestaan nie.
Op die skietbane aangekom, moes ons in twee rye en op dubbelpas na die skyf marsjeer, maar hier het dinge egter byna in 'n oorlogstoestand verkeer, want sonder waarskuwing is daar 'n paar skote met buskruit geskiet, nie om ons in verwarring te bring nie, maar om die noodsaaklikheid van bewegingloosheid duidelik te maak. Die gevolg was dat wanorde onder ons losgebreek het en binne 'n paar sekondes was al die skutters op die loop gejaag, en hulle het hulself agter die eerste en beste beskikbare dekking verberg.
Hierdie voorval het ons baie senuagtig en prikkelbaar gemaak, en baie geduld, sagte behandeling en takt moes aan die dag gelê word voordat ons weer selfvertroue gehad het.
Die skyf, met 'n kol van omtrrent 1 1/2 duim in deursnit, was op 'n afstand van 60 jaarts geplant, en ons was daardeur genoodsaak om ons veldkykers (streng verbied) te gebruik voordat ons kon korrel neem, sodoende moes ons dan die vereistes van skietbaandisipline verbreek want ons moes in seksies van drie in plaas van EEN op die front tree, nl die skut, 'n tweede wat die veldkyker gebruik om die punt waarna die skut moet mik te beskrywe en die derde wat moes dien as skietrus. Ongelukkig het een van die "rekrute" vergeet om die rigmiddele suiwer regop te hou, sy het albei haar oë styf toegeknyp en - gevuur, voordat sy uit die 'laai'-houding in die 'aanlê'-houding was.
Dit was toe besluit dat dit veiliger sou wees om ons verder af te rig in die 'sittende'-houding!
Daarna het ons geskiet sonder skyf en verskillende voorwerpe in die veld was gebruik as mikpunte. Die "rekruut" met die veldkyker het vier mikpunte beskrywe, en na die bevel van 'vuur' het een van die mikpunte skielik in die lug gespring en die veld ingestorm. Dit was jammer dat hierdie 'mikpunt' oom Org se kampioenbul was, maar ons kon toe niks aan hierdie ou sakie doen nie. Gelukkig was daar een van die mediese tipes onder die belangstellendes, en nadat hy tevergeefs al sy kennis in eerstehulp aan die dag gelê het, was dit algemeen aangeneem dat daar tog braaivleis gehou sou word.
Verder was ons geleer dat die rewolwer op twee maniere gebruik kan word (a) as wapen vir een hand en (b) as wapen vir twee hande. Ek verkies natuurlik die tweehandegreep - sodoende hoef ek nie korrel te neem nie en ek kan die 'lêende' skiethouding inneem, met die kolf as stut vir my ken!
Na die eerste rewolweroefening is ek oortuig daarvan dat daar nie EEN agterlike skutter onder ons dames is nie, en ek kan waarborg dat ons binnekort op bevel van 'snelvuur' sal kan staande laai, knielende korrel en sittende vuur - (standaardtyd een minuut!). En as die bevel 'vul magasyne' gegee word sal ons nie die rewolwers wegsmyt en na ons kosmandjies storm nie, maar sal ons direk weet dat die opdrag is om aan te lê en te skiet!!
Verder dat die terme 'oorgehaalde haan' en 'ontspan vere' niks met die henne in die hok te doen het nie!
 

Reisigersforum

Ek vra vrae oor die Agraco muskietplakker, kampeer in Mosambiek en die Richtersveld. Klik hier en kyk of lewer kommentaar.
 

Glimlag!

'n Paar Dol Definisies!

HUWELIKSERTIFIKAAT : 'n Soort jaglisensie wat jou tot een bok beperk.
KRAAI : Spreeu in 'n aandpak.
KREDIETKAART : Iets wat meeste mense gebruik wanneer hulle ontdek geld kannie alles koop nie.
VLEISBRAAI : 'n Partytjie waar die kos so 'n bietjie rou en die gaste so'n bietjie gaar is.
WITTEBROOD : Die vakansie wat 'n man neem voordat hy vir 'n nuwe baasbegin werk.
ALMANAK : 'n Kaart waarop jy kan sien hoe om by Kersfees uit te kom.
AMBULANS : Kombi met diskoligte.
BAAS : Wat Ma vir Pa laat dink hy is.
BABA : 'n Soort engel waarvan die vlerke korter word namate die bene langer word.
BABAWAENTJIE : Verlede jaar se pret op wiele.
BEGROTING : Iets wat jou laat wakker lê nog voor jy jou geld bestee.
BELASTING : Die beloning vir energie, harde werk en spaarsamigheid.
BOOM : Iets wat jare op een plek bly staan en dan skielik op 'n dag voor 'n voertuig inspring.
BROMMER : Vlieg met 'n dieselengin.
BRUIDEGOM : Imand wat hom teen iets taais vasgeloop het.
BRUNET : Uitgebrande blondine.
DIEET : 'n Manier van maer word waarvoor jy gou dik word.
EEND : 'n Hoender met roeispane vir voete.
EIER : 'n Voël se geboortedo(r)p.
ETENSTYD : Die enigste tyd wanneer 'n kind nie wil eet nie.
GERAAMTE : Iemand met sy binnekant buite en sy buitekant weg. GESINSVAKANSIE : Wanneer jy alles saamneem waarvan jy eintlik wil wegkom.
GEWETE : Iets wat pla as alles baie lekker gaan.
HELIKOPTER : Eierklitser met ambisie.
INRYTEATER : 'n Plek waar jy ou prente en jong paartjies aantref.
KARSIEK : Dit wat jy elke maand kry as jy die paaiement moet betaal.
KORTPAD : 'n Pad waarop jy niemand kan kry om jou te sê waar jy is nie.
LEKTOR : Iemand wat die rare talent het om 'n student aan die slaap te praat.

WAARHEDE, NAARHEDE .....

Daar's twee soorte mense by 'n partytjie, die wat wil ry, en die wat wil bly.
En gewoonlik is hulle met mekaar getroud.

Al ooit opgelet hoe baie verliefdes met toe oë soen ?
Ongelukkig gebeur dit dikwels dat hulle ook so trou.

Daar's net 3 maniere om huistakies te verrig :
Soos 'n BEJAARDE : stadig.
Soos 'n VOLWASSENE : deeglik.
Soos 'n TIENER : glad nie.

Siekefondse is nes 'n hospitaaljurk : jy dink maar net jy's ten volle gedek.

Sommige vroue dink bikini's is onbehoorlike drag.
Ander het weer die figuur daarvoor.

Voor haar troue sweef 'n vrou in die wolke.
Na haar troue sit sy haar voet neer.

Vroue jok oor hul ouderdom.
Mans oor hul salaris.

Dis altyd die laaste sleutel aan die bos wat die deur oopsluit.

Jy weet jou dogter is besig om groot te word as sy stadig begin aantrek en vinnig geld bestee.

Snaakse ding 'n hoender. Dis al dier wat jy kan eet voor hy gebore word en na hy dood is.

'n Vrou se mond is nes 'n stukkende garagedeur.
Jy sukkel jou gedaan om hom toe te kry.

Meisies wat bril dra, kan net so aantreklik wees soos die wat nie bril dra nie.
Dit hang net van hul raamwerk af.

'n Skinderstorie is nes 'n eier - as hy eers uitgebroei het, kry hy vlerkies.

As 'n man rats spring om die motordeur vir 'n vrou oop te maak, kan jy maar weet dis of 'n nuwe vrou of 'n nuwe motor.

Piekniek is vir kinders ...en miere

Goeiemore vriende, 

Groot is SY genade!  Dit was weer ‘n heerlike week vol beloftes en seeninge!  Skaars was die nuusbrief uit en die oproepe kom in.  Dankie ook vir die ondersteuning en beste wense in ons stryd teen die duiwel en sy trawante!

Baie dankie aan al ons getroue ondersteuners met groot naasteliefde in hulle harte.  Dankie dat julle hierdie Kersfees van 2006 vir soveel mense baie besonders gaan maak! 

Daar het nou al ‘n hele paar geskenke ingekom asook 344 lekkergoedpakkies!  Ons het nog beloftes gekry en ek weet en glo dat ons uiteindelik – soos altyd in die verlede meer as genoeg gaan inkry om almal se harte bly te maak!   

Die winkels is alreeds propvol kersfeesversierings wat ‘n mens sommer die “Kersfees-gevoel laat kry”  Ons kort werklik nog honderde geskenke!  Teen R70 per geskenk glo ek dat dit nie buite ons bereik gaan wees om vir elke bejaarde en kind ‘n lieflike geskenkie te kan koop nie.  Die opgewondenheid loop nou regtig hoog onder die kinders want oor minder as 23 dae begin ons Kersfeesfunksies!  (amper kry ek hartverlamming !! die tyd begin nou min raak!) 

Sou daar nie vir jou tyd wees om self ‘n geskenkie te gaan koop nie, is ‘n donasie meer as welkom.  Partykeer kry ons heelwat van dieselfde artikels in en het dan fondse nodig om ‘n geskenkie “op te top” .   Merk asb duidelik by verwysing “Kersfees 2006”  dan weet ons waarvoor die donasie was. 

Verder het ons dan ook fondse nodig vir verversings tydens die funksies.   

By die kindergroepe is dit boereworsrolletjies en koeldrank vir die middagete - met snoeperye daarna bv. aartappelskyfies, lekkergoed, koeldrank ens.

By Margaretha Ackemann Ouetehuis het ons verversings vir ongveer 220 mense nodig.  (Inwoners, personeel en gaste) Koeksisters, hertzoggies, vleispasteitjies, aartappelskyfies, springmielies, sagte lekkergoed soos marshmallows, klein sjokolades, “cupcakes” ens.  Tenminste 220 van elk!

By Bloudakkies was ons so bevoorreg om ‘n maatskappy te hê wat alles borg!  -  Wat ‘n blessing!! 

Ons het nou 10 dae tyd om alles in te kry!   (Miskien moet ek nie somme maak nie want die dae, bedrae, en hoeveelhede is genoeg om enige een die ritteltids te gee!!)   

Sal almal wat onderneem het om self geskenke te koop dit asb voor die 6e November 2006 by my aflewer.  Hierna is dit voorraad neem, verpak en versprei! om alles gereed en reg te kry vir die GROOT DAG!! 

ALGMEEN

Onthou ook asb dat tenspyte van al die Kersfees insamelings ons nog daagliks middagete vir 200 kinders moet gee, asook die 98 gesinne se noodkospakkies

elke  Vrydag en  Dinsdae se middagete vir 160 bejaardes!!   .Hiervoor het ons groot hoeveelhede kos nodig asb,  stapelvoedsel soos mieliemeel, rys, suiker, olie, margarien, blikkies vleis en gemengde groente, pasta, soya, broodsmere ens. Vars vleis is absoluut ‘n luukse en ‘n baie duur item elke week.  By die kinderbedienings moet ons tenminste by elke groep 17kg vleis gaarmaak elke dag en by die ouetehuis vir 160 bejaardes is dit 30kg op ‘ slag!  Vleis is ons grootste enkele uitgawe.!!  Enige kruideniersware is meer as welkom en bitter nodig – groot asb!! 

Intussen stry ons nog die stryd teen die kwaadstokers in Danville en vir die behoud van die Andeon projek.  Onthou ons projek en al hierdie minderbevoorregte mense wat werklik so swaar kry in julle gebede asb!   Ons is nie bang nie want ons weet dat ons in Ons Vader se hande is, en dat HY na sy kinders sal omsien.

Ons weet ook dat daar nie ‘n waarborg is dat dit elke dag maklik sal wees nie – maar wat ons wel weet is dat ons moet sterk staan teen al die aanslae om die Projek te ondermyn!  ‘n Kleurlingvrou som dit verlede week so op “ Smaak my die duiwel begin nou al overtime werk om soveel as moontlik misery te veroorsaak so met Christmas nou om die draai!!!!”

Help my asb om sterk te staan teen al die aanslae asb!  Dit is nie elke dag maklik nie!  Maar met ons ondersteuners se volgehoue hulp kan ons almal saam ‘n groot verskil in ons minderbevoorregte bejaardes en kinders se lewens maak.

‘n Geseende week vir almal 

Elsabe

Bankbesonderhede:

Danville Hulp Projek
FNB - Brooklyn
Takkode:- 251 345
Tjek rek: 620 546 34128
Swiftkode: FIRNZAJJ926

Aflewerings adres:-

286 Cliffendale rylaan
Faerie Glen
Tel 012 991 3914 Sel 082 8282 551
E.pos - elecnet@mweb.co.za
Webwerf: www.danvillehulp.co.za
PS Bel asb voor jy ry
 

Pasella #3 - Hierdie keer is 'n paar CD's op die spel, maar dis nie sommer weggee nie, julle gaan werk daarvoor. Ek wil weet watter dis verpersoonlik vir julle Tradisionele Suid Afrikaanse Boerekos. Gee vir my die dis se naam (en die resep as jy dit het) en sê ook hoekom dit nou juis DIE dis is wat jy as Tradisioneel Suid Afrikaans beskou. Klik hier om die epos te stuur. Die CD's? Peterjasie se Groot Afrikaanse Rate en Resepte Versameling. Ek stuur 'n CD aan persone (5) wat die beste bydraes instuur wat ek ook sal publiseer

.

Hierdie is een van die vele ou resepte uit vergange se dae in Anna Eksteen se eBoek, Onthou jy nog..

OUTYDSE SPESERYKOEKIES

425g banketmeelblom
3ml sout
3ml koeksoda
5ml fyn kaneel
3ml fyn naeltjies
200g karamelbruinsuiker
125g botter
1 eier (geklits)
90ml sjerrie of port
5ml lemoenskil, gerasper
amandelsplinters vir versiering

Sif meel, sout, koeksoda, kaneel, naeltjies en suiker saam. Vryf botter in. Voeg eier, sjerrie en skil by. Bedek deeg en laat ongeveer 1 uur lank staan. Rol deeg uit tot 3mm-dikte. Druk ronde koekies uit,druk ‘n stukkie amandel in die middel van elke koekie vas. Plaas op ‘n gesmeerde bakplaat. Bak ongeveer 15 minute lank in voorverhitte oond by 200C.

Hoes:

1 Eetlepel kamferbrandewyn, 1 eetlepel water, 1 telepel rooi lafentel, 1 teelepel wonderkroon essens, 2 telepels parragora, 2 salares poeiers, 1 mespunt rooi poeier en suiker tot dit 'n stroop vorm.

Boegoe, anys, hottentotskooigoed, katte kruie, fan alles 'n wynig op water getrek en enige male per dag te drink.

2 Lepels heuning, 1 lepel asyn deurmakaar en 4 of 5 male per dag 'n telepel drink.

....of gaan sommer gou apteek toe - Peter

Hierdie lyk na my soort slaai, enigiets wat beide aartappels en boerewors bevat kan net lekker wees:

BOEREWORS AARTAPPELSLAAI

SLAAISOUS:
30ml wit wynasyn
125ml olyfolie
3ml swartpeper
1 knoffelhuisie fyngedruk
15ml Dijon mosterd
5ml suiker

SLAAI:
1kg baba-aartappels, met skil, gehalveer
15ml olyfolie
1 ui, dun gesny
1 rooi soetrissie, in repe gesny
500g gaar boerewors, in skyfies gesny
1 groot steel seldery, gekap
10 ml vars tiemie, gekap
50ml vars kerwel (chervil) gekap

Klits alles vir slaaisous saam tot goed gemeng. Kook baba aartappels tot net sag en dreineer. Verhit intussien olie en braai uie en soetrissie tot sag. Voeg worsstukkies en tiemie by en meng deur. Meng liggies met gaar aartappels. Giet slaaisous oor terwyl steeds warm. Meng daarna die kerwel deur. Bedien terwyl nog louwarm.

Ons maak deesdae nie meer 'n potjie sonder om kluitjies ook daarmee saam te maak nie, hier is 'n resep uit nog een van Anne se boeke:

KRUIEKLUITJIES

250ml bruismeel
5ml sout
10ml botter
15ml vars of 5ml droë gemengde kruie
1 eier geklits
60ml melk

Sif meel en sout saam. Vryf botter in tot mengsel soos broodkrummels lyk. Voeg kruie by. Klits melk en eier saam. Meng liggies met meel. Skep lepels vol bo-op vleis in pot. Moenie die deksel oplig vir ten minste 10-12 minute, terwyl die kluitjies kook nie.

.

st se  pitkos

Klik hier om st se webwerf te besoek
en om in te teken op sy weeklikse nuusbrief

“Die weeklikse nuusbriewe van Dr Potgieter is my dosis lewens vitamiene en het weer kleur en motivering vir my lewe gegee” – ‘n leser.

Nog gevleuelde woorde van ST:

Glimlag en maak ‘n verskil

Die wêreld is ‘n doodernstige plek. Die koerante en televisieskerms basiun elke dag die moord en roof, die ellende en grusaamheid van gebeure in ons land uit. Mense gaan gebukkend onder moeilike omstandighede, daar is hartseer en spanning in ons lewens en gesinne.

Maar jy kan ‘n verskil maak. Met humor en met ‘n glimlag.

Ek het eenkeer gelees van ‘n jong man wat nie meer wou lewe nie. Hy het in sy motor geklim en gery na ‘n plek waar hy selfmoord wou pleeg. Op pad na die plek moes hy by ‘n verkeerslig stilhou. ‘n Meisie hou langs hom stil en toe hy in haar rigting kyk, glimlag sy vir hom. Skielik sien hy dat die lewe nie regtig so sleg kan wees nie. Kyk, ‘n mooi meisie het moeite gedoen om vir hom te glimlag. Hy kyk om hom rond, sien die blou lug en die son wat helder skyn, die groen bome met bloeisels langs die pad, die blomverkoper wat vrolik sy ware van die hand sit. En toe besef hy die lewe is steeds die moeite werd ondanks die probleme waarmee hy worstel.

Glimlag vir iemand en red ‘n lewe.

Ek het al so misrabel en ellendig gevoel dat ek skoon mislik was. Dan het iemand gekom met ‘n stukkie humor en met ‘n positiewe lag my dag opgebeur.

Die wêreld is ‘n doodernstige plek. Dis waar. Maar daar is nog altyd plek vir humor. Want humor is teken van lewe en kreatiwiteit. Humor verminder onverdraagsaamheid tussen mense. Gespanne situasies word ontlont deur humor.

Hanteer jy alles egter met ‘n swaarmoedigheid, gekla en stuurse uitdrukking moet jy verwag dis wat jy op die lang duur gaan terug ontvang. Dis soos die lewe werk – dit wat jy gee, kry jy weer terug. Jy maai wat jy saai.

Benader dus mense met ‘n blye gemoed en kyk of jy ‘n stukkie lag en blydskap in hul lewe en dag kan sit. Wanneer jy dit doen, gaan jy soveel meer terug ontvang.

Gebruik humor en jou glimlag om ‘n brug te bou tussen jou en jou medemens. Jy kan ‘n groot verskil maak in ander se lewe. Dit kos niks om te glimlag nie – doen dit!! Jy gaan met rente veel terug ontvang.

Wanneer jy iemand anders se dag beter maak deur jou glimlag en humor gebeur daar iets. En daardie ietsie wat gebeur is ‘n kleine wonderwerk in jou hart.

Probeer dit – dit werk!!

‘n Sprankie wysheid vir die dag

“Ek wens jou die nodige humor toe om dinge te kan relativeer. Met ‘n bietjie humor kan jy onmoontlike dinge moontlik maak.” – Phil Bosmans

Dr ST Potgieter
Tel: 021 949 5007
Sel: 083 227 3683
Epos: st@pitkos.co.za

Soek jy plek om te gaan kampeer? Klik dan hier!

Skooltake?? Klik hier

Vakansieverblyf is altyd 'n probleem, dié mense maak dit makliker om te kry, klik net hier.

Teken hier in op die poslys en lees ook die argiewe.

Om uit te teken, stuur vir my 'n epos en dui jou naam aan asook die eposdres waaronder jy ingeteken is

Kontak my hier.

Druk jou speld op my besoekerskaart!