Welkom aan alle nuwe intekenare!

Kry jou Droomkaartjie! Die UK Lotto betaal nooit minder as 3 miljoen pond uit nie (en gereeld veel meer!), kan jy dit bekostig om NIE 'n kaartjie te kry nie? Dis maklik en veilig! Klik hier!

Dozi tree op Valentynsaand (14 Februarie) by die Albertonse Burgersentrum op. Kaartjies by Computicket beskikbaar. Kom ondersteun die geleentheid asseblief as julle in die omgewing is. Dis fondsinsameling vir ons kerk.

Weereens het ek lekkerlees Afrikaanse artikels deur onder andere Estelle de Bruyn en Annelie Botes, ek is seker julle sal dit geniet! Mara Swanepoel lewer ook weer 'n welkome bydrae.

Verder ondertoe is 'n paar lekker potjieresepte, gaan kyk gerus.....

Is dit my verbeelding of word die aantal advertensies op TV net al hoe meer (irriterend)? Binnelanders is nou net 'n halfuur lank maar in daardie halfuur was daar nou die aand nie minder as 14 advertensies nie, twee keer sewe na mekaar! Die ergste van almal is egter Noot vir Noot. Ek tel gistraand dat gedurende die eerste 33 minute van die program hulle nie minder as 32 advertensies vertoon het nie. (Eenkeer net mooi nege na mekaar!) Hulle moet seker 'n klein fortuintjie maak uit die SMS-kompetisies en dan nog ABSA se borgskap ook. Hoekom die stringe advertensies? Johan Stemmett moet alles aframmel om die program EN die advertensies in een uur in te pas! Lyk my die mense word nou geldgierig. Ek dink party mense  maak staat op die populariteit van die program on hulle beursies vet te voer!

My bewondering vir Steve groei by die dag. Hoe hy alles kan doen wat hy doen nie weet ek nie. Nie net is hy 'n sanger en liedjieskrywer van formaat nie, hy het ook 'n passie vir Afrikaans asook vir reg en geregtigheid. As iets na aan sy hart is, sit hy sy volle gewig by om iets aan die saak te doen. Ek is betrokke by die Danville Hulpgroep en Steve daag eendag daar met 'n limo op  en vat die kinders vir 'n "spin". Wel gedaan, Steve, hopelik kan ek jou eendag persoonlik ontmoet! Klik hier om Steve se Blog te gaan besoek

Dis gewoonlik 'n gesukkel om geskenke te koop, ek het 'n paar idees wat jy dalk in sal belangstel, klik gerus hier om te gaan kyk. Daar is bv. 'n CD met 50 resepteboeke op (Engels), jy hoef nooit weer 'n respteboek te koop nie! Ek het nou ook 'n eBoek oor kruie (in Engels, het nog nie tyd gehad om dit te vertaal nie) vir net R50. Klik hier vir betalingsbesonderhede.

Kom ons skop oudergewoonte af met Estelle se bydrae. Sy is verbonde aan die Republikein, die enigste Afrikaanse dagblad in Namibië. Kontak haar gerus, sy hoor graag van julle.

VREESLIKE GEGROET

VANDAG wil ek graag ’n lessie vir die politici en sommer almal wat amptelike funksies toespreek leer.
Met die afgelope begrafnis van die ontslape oud-Speaker, dr. Mosé Tjitendero, het die verskynsel van die vreeslike uitgerekte groetery, opnuut my nekhare laat regop staan. Toegegee, dis beslis goeie maniere om ’n iedere en elke hoogwaardigheidsbekleër wat sulke geleenthede bywoon, dag te sê, maar as elke spreker dit doen, kan die spulletjie nogal temerig raak.
Die groetery met die begin van elke toespraak en huldeblyk het min of meer só gegaan: "Die seremoniemeester; die weduwee, sy edelagbare die President, sy edelagbare die stigterspresident, die hoog agbare Eerste Minister, die agbare Adjunk Eerste Minister, die agbare Speaker van die Nasionale Vergadering, die agbare Voorsitter van die Nasionale Raad, sy edele die hoofregter, agbare Ministers, agbare lede van die Nasionale Vergadering, agbare lede van die Nasionale Raad, ekselensies en lede van die diplomatieke korps, die besoekende adjunkvoorsitter van die Suider-Afrikaanse Ontwikkelingsgemeenskap se Parlementêre Forum, die agbare adjunk speaker van die Zambiese Parlement, die agbare adjunk speaker van die Suid-Afrikaanse parlement, raadslede van streek en plaaslike owerhede, kerklikes en gemeenskapsleiers, familie van die ontslapene, mede roubeklaers, dames en here."
En dit is ’n opsomming. Onthou dat die name van die hoogwaardigheidsbekleërs ook nog genoem word. Ek daag die leser uit om met ’n horlosie te sit en te kyk hoe lank dit neem om deur die hallo-sêery te kom.
Na dié vreeslike groetery kan die spreker eers met sy toespraak begin en is die arme gehoor al stokflou geluister.
Sommige sprekers gaan selfs verder en groet boonop ’n ieder en elke hooggeplaaste se gade met die titels en die naam.
Een van my kollegas in die media het beraam dat die tyd wat die herhaaldelike groetery in beslag geneem het, die program met bykans ’n uur verleng het.
By amptelike geleenthede waar meer as een spreker aan die woord moet wees, kan dié oor en oor groetery en erkenning gee aan die teenwoordigheid van hooggeplaastes, nogal die effek van met jou naels op ’n swartbord krap afgee. Wat, wil ek weet van die gewone mense wat ook gekom het om te luister. Is hulle bloot in die kategorie "dames en here" ingeprop? As ons dan nou so polities korrek wil wees, moet hulle nie ook by die naam uitgesonder word nie?
Sal dit nie meer sin maak om almal een keer aan die begin van die verrigtinge behoorlik te groet en vir elke spreker daarna om bloot te sê: Geagte familie van die ontslapene óf dan net die heel belangrikste gas by die geleentheid uit te sonder en te sê "alle ander protokol in ag geneem" en aan te gaan met die huldeblyk of toespraak nie?
Kom nou, ons Namibiërs is respekvolle mense wat eer en agting betoon soos verwag, maar ons is ook ’n informele en ontspanne nasie wat sekerlik ’n plan kan maak om die herhalings uit te skakel.
As ’n mens een keer gegroet en erken is, is jy mos gegroet en erken. Toe, asseblief, maak ’n plan.  

Hierdie stukkie is opgedra aan die Florida meer, daar waar ek ure spandeer het – toe dit nog veilig was.

Vreugde van die treurwilger

Onthou jy nog die dae van so lank gelede. Ons was jonk en sorgvry.

Ons het ure spandeer by die Florida meer. Ons het selfs vir ons een van die treurwilgers gebrandmerk as ons eie stukkie hemel op aarde.

Onthou jy hoe het ons sorgvry onder die boom kon sit as die son te warm was, hoe ons saans onder die boom na die maan en sterre gestaar het.

Hoeveel ure het ons nie hier deurgebring nie. Ure so sorgvry en sonder kommer, ure van net ek en jy, en jy en ek.

Dis ook hier waar ek kon studeer, vir my matriekeksamen en later op universiteit. My eie plekkie waar ek altyd welkom was. Ek het selfs na die matriekeksamen saam my vriende in die meer ingespring waar ons ons skoolklere uitgetrek het en net so ter water gelaat het.

Dit was heerlike dae, dae wat my gefassineer het. Dae waarin ek geleef het. 'n Blink toekoms wat vir my gewink het.

Dis ook hier by die treurwilger waar ek my hart kom uitstort het. Ek het selfs die blydskap van my eerste swangerskap hier kom vier. Hier in die stilte.

Dis ook hier waar ek my Skepper volkome gevind het. Hier waar Hy altyd teenwoordig was en waar ek Hom kon aanroep in tye van nood, en kon dank en eer in tye van vreugde.

Ek het my soms ure gekommer oor waar die woord “treurwilger” vandaan kom. En ek besef vandag dat vir elke traan wat ek al onder die ou ruwe stam gestort het, het die ou wilger 'n duisend gestort. En met trots die vreugde van my trane gebaar.

Dis die vreugde van ons ou treurwilger. En my liefste wilger – vir jou behoud sal ek veg. 

©Mara 2006
Mara se Blog

Ik zal daar zijn

Die Donderdag voor Paasnaweek het ek die dakkamer by die Van der Gaags in Arnhem betrek. Anderland was bruidmooi in haar lentesluier. Alles so georden, wetsgehoorsaam, vreesloos. Rustig. Boere wat koeie aanjaag. Kinderen en bejaardes op fietse. Nêrens ‘n papier, bedelaar of diefwering nie. By die wynhuis staan die specials oornag uitgepak in ‘n sypaadjie-vaatjie vol ranonkels. Die Van der Gaags verseker my die wynhuisman doen dit al jare lank só, en niemand steel die wyn nie. Vir my is dit onverstaanbaar.
Al beskikbare vlug was ‘n week voor ek by ‘n outisme-simposium moes wees waar Raadselkind bekendgestel sou word. In my losloopweek, wyl die huismense om den brode arbei, bewandel ek Arnhem, geserp in my tjalie van my Hindoe-ma. Dwaal in die berkebos neffens die stad en sien tantes rus vroualleen op bankies in die bos. Handsak argeloos eenkant neergesit. Vreemd, vir my.
Ek was maagwerkbang vir die simposium. Wat kon ek, Kammanassiekind, aan 500 geleerdes sê? My toespraak moes in eenvoudige Engels wees, só is gevra. Maar danksy die Boekkoois van die Baai is dit in Hollands vertaal en die uitsprake ingedril. Om met die geleerdes in hulle moedertaal te praat, was ál bidsaad in my saaisak.
Paas-Saterdag vra Rutger of ek die Paasdiens met hulle wil bywoon. Ja, al sal ek min van die Hollandse preek verstaan. Ek sal die orrel en brandskilderwerk indrink. Peins oor weleer toe my geloof nog Grootfontein-eg was. Bid vir die kinders by Buffalo Bills. Vra dat die Here sag sal omgaan met ons floiingrige land. Ons floiingland met Hom ook. Dankie sê dat Hy in sy Groot Begrip my common prost oorgesien en my kalkoenkampie gehuldig het.
Daar ken ek toe elke gesangwysie en verstaan elke woord van die Paaspreek. Oor Moses wat by die Rooisee gehalt het en die moeë Isrealiete moes deurkry. Hoedat God gesê het hy moet met sy staf op die water slaan; daar sal ‘n droë pad oopgaan. Moses het gekibbel, want, in alle respekte, dit moes laf gelyk het. Maar God het hom verseker: Ik zal daar zijn …
En daar in die Paaskerk glip my trane uit. Oor Tattie sonder ma. Treursiele wat by Van Stadensbrug oorgegee het. Die bejaarde mama wat verkrag is, en toe sny die vark haar tong af en grou haar oë uit. Moses wat nooit die Beloofde Land gesien het nie. Oor die 6de van die 6de maand. Ver reise op soek na ‘n tiemiebossie in die molm van die rivierwilg. Ons almal se kinders wat vra: Wat beteken jou vlag dan Suid-Afrika?
Sodat ek van my skamele 120 euro’s ‘n volle 20 in die kollektesakkie gesit het. En in my dakkamertjie stuk-stuk my toespraak in maklike Afrikaans oorgeskryf het. Want of die gangers Christene was, of nie, wou ek dat hulle, terwyl hulle deur die woestynland van outisme trek, sal vashou aan die Paasvers: Ik zal daar zijn …
Toe, Vrydag voor middagete, kom die uur van angst. Die gangers is rusteloos, oorlade van ‘n oggend vol ingewikkelde vakterme. Ek sal moet práát om hulle vas te hou. Terwyl ek podium toe loop, wens ek my pa en ma kon hulle Bybelhoenderkind sien. Sommer omdat alle ouers vir hulle kinders se onthalwe droom.
Die Landman van die saai-akker het my tong gerig, want my Hollands het gevloei. Voor my het die skare verstil. En ek het geweet dat mens soms net een maal in ‘n leeftyd ‘n Mosesstaf in die hand gegee word. Of dit anderland, floiingland of niemandsland is, traak nie. As dit slaantyd is, moet jy in blinde geloof slaan. Die droë pad sál oopgaan.
Ek het die berkebos gegroet. Die wynbottels. My dakkamer. En ín my kon ek die klaende roepstem van my droewige land hoor: Kom huis toe, jou mama wag vir jou.
Johannesburglughawe was vuil. Hakskeen-bedelaars wat kerm vir English money. Ek het my handsak vasgeknyp, wantrouig oor elke nabye siel. Tog het die lug rég geruik; vaagweg na doringhoutvuur. Dit was asof die rondlêgemors so hoort. Afrika is Afrika. Dis my moederskoot. En ook in hierdie lanferland geld die belofte: Ik zal daar zijn.  

Ek kom die laaste tyd agter dat daar 'n definitiewe oplewing in Afrikaner patriotisme en varal Boere patriotisme is. Persoonlik gee dit my 'n warm gevoel van trots.

Die volgende artikel sweef op die internet rond, laat mens dink......

Ekskuuste dwarsboom ontwikkeling

"Hoekom het jy die miljoen rand gesteel?"
"Ek was honger!"

So lui 'n stokou grappie waaroor middeljariges van vandag destyds in hulle kindertyd gelag het - min vermoedend dat hierdie situasie nog in hulle leeftyd 'n werklikheid sou word.

Baie mense beskou blykbaar diefstal en roof as heel aanvaarbaar, jy moet net beweer jy was daartoe gedryf deur honger, gebrek, apartheid of die waan dat jou oer-voorouers onderdruk was.

Laat ons dus maar vandag oor 'n paar sake reguit praat:

'n Mens steel nie omdat jy honger of arm is nie - jy steel omdat jy skelm is. Niemand was nog ooit in hierdie land so volledig onderdruk soos die Boerevolk na die Tweede Vryheidsoorlog nie.

Ons voorouers wat die oorlog en die konsentrasiekampe oorleef het, het na die doodse leegheid van vernietigde plase teruggekeer - uitgehonger, hartseer en verpletter. Maar hulle het nie geroof en gemoor en gesteel nie. Hulle het met harde werk, deursettingsvermoë ’n swaarkry so presteer dat hulle weldra nie net hulleself nie, maar ook hulle huidige onderdukkers, goed kon versorg.

Toe hulle kinders in Engelse skole gestop is en gestraf is as hulle dit durf waag het om Afrikaans te praat, het hulle nie klippe gegooi en skole afgebrand en geweld gepleeg nie.

Hulle het hard geleer, hulle eie CNO-skole gestig en uiteindelik bo uitgekom sodat die Boerevolk vandag vir niemand op akademiese, tegnologiese of wetenskaplike gebied terug hoef te staan nie.

'n Mens moor nie omdat jy voorheen benadeel is of omdat jou werkgewer jou nie tederlik genoeg behandel nie - 'n mens moor omdat jy 'n barbaar is wat nie verdien om deel van die samelewing te wees nie.

Na die Tweede Vryheidsoorlog het Boere-mynwerkers absoluut geen regte gehad het nie en moes hulle gesinne met minder as 'n hongerloon probeer onderhou. Maar hulle het nie bejaardes gaan doodmartel en gesinne uitgemoor nie.

'n Mens word nie 'n agtergeblewene omdat iemand anders nie genoeg vir jou doen nie. 'n Mens word 'n agterblyer omdat jy nie presteer nie. Niemand het die Boerevolk na die Tweede Vryheidsoorlog vooruit gehelp nie - ons het self gewerk en volhard om sukses te behaal.

En elke ding wat ons het, het ons verwerf - apartheid het nooit plase en poste en posisies aan Boeremense uitgedeel nie.

As alles altyd vir jou verkeerd loop sodat jy voel jy maak nooit enige vordering nie, is dit dalk 'n goeie gedagte om op te hou soek wie anders as jy self vir al jou ellende verantwoordelik is. Ruk jou reg en presteer jouself in die voorspoed in.

En dit geld vir ons eie mense ook. Net ons eie werk, prestasie en geloof gaan bepaal of ons as agterblyers in die vergetelheid gaan wegsink en of ons weer as trotse, beskaafde, gerespekteerde volk sal opstaan.

Selfs in die nuwe Suid-Afrika is daar steeds geleenthede vir vindingryke, geesdriftige mense wat bereid is om hard te werk en vir hulleself 'n toekoms los te spook.

Mag die Boerevolk nooit pateties raak nie.

Nou goed, die volgende is nie alles Afrikaans nie, maar ek plaas dit net om die rekord reg te stel, ek is nie 'n Engelsman nie! Dis nie my skuld dat my pa in Wallis gebore was nie. En boonop het ek in Koster in die Wes Transvaal grootgeword en ek beskou myself as 'n Afrikaner.

Ewenwel, hier is die epos wat ek ontvang het, biekie deurmekaar, maar nogtans lekkerlees - soortvan :-) Ek het nog nooit 'n rookbraai gehad nie, dalkies moet ek dit tog probeer!

Dear Peter,

A li'l bit o' 'istory on meself afore we talk about the important tings in life.

Ek is gebore in Kak a' mas northwest of Kenhardt, district of Gordonia, de land of Upington. Geen wonder met al hierie Ingelse name is ek 'n confused boer, nê?
To make it worse, we have Swiss-German/German/French/Italian/Irish, mix of blood in our alcohol stream!

Nooit, I want to tell you that in the end someting prevaled 'cause I became a successful advocate in Josie in de pre-flood/ante-deluvian days( '80 - '94......) and den went on to Eire where I spent many a good time enjoying the Irish crack (not de sniffing sort), meaning good humour...of course and plenty of pint! Dêre I nearly lost my fortune as dese Irishmen are fly man!

Terug na die Boesmanland-vat-my-hand-lei-my-na-die-rand-se-kant wereld waar ek vandaan kom.
Boetie, ek het met die kafferpot grootgeword. My ouma had a very large one in which she used to cook many kilograms of Boeresoap (recipe still wit me aunt), which always cleaned all our clothes better than SuperBriteSurf!

Dis pot was off limits for de chef, but our udder pots was very much in culinary use en dis nou waar my eerste liefde vir die wonderlikste kookgerief, die ysterpot vandaan kom. My eerste babakos was in die potjie gekook, lekker sagte pampoenmoes en vars tuin ertjies en wortels, soet gemaak met ouma se reseppies van botter, bietjie appelkoosjam en whatnot. Ingevoer in die bekkie met 'n klein plat lepeltjie (wat my Ma nog het). Genoeg van my histeria. Vanaand is ek besig om 'n ou potjie van vooraf in te kook. This thing was never truly cured and after reading your inspiring website, I thought: "se moer, ek gaan die ding nou eenmaal skoonmaak en bekook!" And there it is kooking rustig on my stoep for many hours (nie haastig nie) while the 2 chickens are smoking in the Weber. Ek gaan net gou seker maak die affêre ok is ..., Ok, terug, al's reg, anyway, as I was saying, you have inspired me to new hights of potjie cooking, en dit nogal van 'n Ingelsman...! But, in your favour, is, that the most well known potjie name is "Falkirk"!

By the way, did you watch the TV2 - Our Nation In Colour - program on this Cape Town chef who went out to the Bushmen and brought back those wonderful Kalahari-truffles (sandaartappels)! Mindblowing! As a kid I went out to the same soil and did the same thing, including the woestynkomkommers en die N'goba...! Hoe lekker kry ek nou.

Cheers man, lekka eet en laat my weet wat jy nog in jou mou hou ("what's up?", in rooinektaal!)

Kind regards,
Liam (in jou taal, of Willie in my taal)

ps. We just had that oak-smoked chick and it was severely devine.

Recipe: 2 whole birds, fat trimmed, skin on, 'erbs to taste on skin and wit'in; add a little lemon peppa
(Ina Paarlman's mucho) and Braai salt to taste;
Indirect doudle-sides Weber charka of medium-high heat;
Western Cape oak barrel shavings (400 grams, soaked 20 minutes in water);
1 1/2 hours in kettle;
Place birds in large aluminium braai container back in kettle and warm up for 5 minutes;
Place dish on table and allow 5-10 minutes for sauces to settle into flesh before cutting and
serving.
Munch away and say last prayers.

Met elke uitgawe fokus ek op 'n Afrikaanse webwerf.

 

Afrikaanse Lied

Iemand wat in Melbourne woonagtig is stuur vir my nou die dag die skakel na 'n webwerf wat Afrikaanse midi's op het asook die woorde van 'n hele klomp Afrikaanse volksliedere. Johann Lochner, die eienaar van die webwerf verleen toe goedgunstiglik toestemming dat ek van die woorde vir my nuusbrief kan gebruik. As julle self wil gaan kyk,klik op die skakel:
Ons Blêrkas van Afrikaanse Volksmusiek

IN DIE HELDER MAANSKYN

Woorde: C.G.S. DE VILLIERS
Musiek: "Au clair de la lune", Franse Kinderliedjie

In die helder maanskyn, goeie buurmansvrou.
Ag, my pen is stukkend, leen my joue gou.
Ook het ek g'n kers nie, weg my tonteldoos.
Help my goeie buurvrou, wees tog net nie boos.

In die helder maanskyn antwoord buurvrou net:
Nee, ek het g'n kers nie, ek is reeds in bed.
Vra vir Hannie langsaan, vrou van ou neef Koos,
want in haar kombuisie staan sy tonteldoos.

2010 - Wat dink jy sal die gevoel wees as ons na die Wêreldbeker terugkyk?

Wat's nuut op Kalie se Boeremusiek webwerf?! Ons het nou 'n eie domein - dis nou vir die wat nie die blad onlangs besoek het nie. Gaan loer gerus by http://kalie.boeremusiek.net

Kalie het ook onlangs begin om DVD's te maak en is tans besig om die destydse Boeremusiek kompetisies wat op TV aangebied was op DVD beskikbaar te stel. Klik op die skakel vir DVD's op die webblad
( http://kalie.boeremusiek.net/dvd.html ) om te sien wat reeds te koop is. Ons het egter reeds meer DVD's omdat Kalie ook privaat DVD's maak en onder andere heelwat van Nico van Rensburg se TV en ander optredes nou op DVD het.

Polkadraai, die nuusbrief van die Pretoria Tak van die Boeremusiekgilde sal van nou af ook op die web bekikbaar wees (Wia is die redakteur van hierdie nuusbrief). Gaan loer by http://polkadraai.boeremusiek.net  as u belangstel om u naam op die poslys vir hierdie nuusbrief te kry. Ouer weergawes van die nuusbriewe sal binnekort geplaas word.

Ons besigheid se naam is Alfa Ateljee en daar is ons (Kalie en Wia) ook besig met ander aktiwiteite wat verband hou met musiek, fotos en rekenaargrafika. Wia maak kaartjies van haar honderde fotos, reël toere vir haar Amerikaanse vriende en maak al die omslae vir die DVD's en laserskywe. Onlangs het sy ook begin met fotobiografieë en fotoboeke. Hier word enigiets en nog wat gedoen - van interesante verwerking van die ou klein, vergeelde swart en wit fototjies van bekende musikante tot familie troues en CD foto albums van vakansies - bv. daardie onvergeetlike geleentheid toe tant Annie in 1968 'n foto van die Pous in St Peters Katedraal geneem het :-) en nog vele meer.

So indien u 'n omslag kort vir daardie nuwe CD of u kosbare gesinsfotos vir die familie wil bewaar - kontak gerus vir Wia! (wia@telkomsa.net )
 

Agterpad Reisnotas - versamel deur Braham van Zyl

Ek luister mos een Saterdagoggend na Amoré Bekker op RSG waar sy 'n onderhoud voer met Braham van Zyl. Ek kontak hom toe en is nou op sy poslys, hier volg een van sy vertellings. Kontak hom gerus en vra om op sy poslys te kom. (Eposdres onderaan die artikel) Hy stuur 'n 'n gereelde nubrief uit.

HAENERTSBURG: Limpopo Provinsie
EK het heel per ongeluk op Haenertsburg afgekom toe ek gedurende November 2005 vinniger deur my reisprogram gewerk het as wat ek beplan het om te doen, en iets gesoek het om my tyd in die Pietersburg (Polokwane) omgewing mee te verwyl. Ek sien toe die naam Haenertsburg op my kaart en besluit om te gaan kyk hoe dit daar lyk.
Haenertsburg lê langs die R71, 55 km oos van Pietersburg. Hierdie kleine dorpie op die platorand hoog bo die Laeveld was vir seker een van die grootste verrassings wat ek in my loopbaan as reisjoernalis gehad het. Ek het nooit só iets daar verwag nie.
‘n Netjieser en skoner dorpie sal jy nêrens anders in Suid-Afrika kry nie. Dis ‘n droomdorp. Ek het die middag na my aankoms by die Oulap B&B (082-856-1776) van Cecile & Johan Smit afgepak en toe sommer dadellik die omgewing gaan verken.
Ek is sommer daar by Oulap met ‘n grondpad die berge in. Groot was my verbasing om aan die anderkant van die berg op ‘n Karoo-agtige landskap af te kom, en daar ‘n geweldige groot turksvyboord te sien. Dié turksvye word glo uitgevoer.
Terug in die dorp, moes ek hoor dat Haenertsburg so ‘n besonderse begraafplaas het, waar mense glo op die grasperke kan gaan piekniek hou. Ek is ook daarheen en was verras met die mooiste panoramiese uitsig oor die Laeveld, vanuit die begraafplaas.
Die volgende oggend is ek eers die dennebosse na Houtbosdorp se kant toe in. Daarna het ek gou gaan kyk hoe Tzaneen lyk, maar ek moes gou weer terug die platorand op en by Haenertsburg verby, want ek het later die middag nog ‘n afspraak op Warmbad (Bela-Bela), wat darem ‘n stywe stoot vanaf die Laeveld is, gehad.
Die beeld van Heanertsburg sal nog lank in my gedagtes bly, want dis nou een plek waarheen ek bitter graag eendag weer sal teruggaan. ‘n Plek soos Heanertsburg sien jy nie sommer aldag nie.

Skryf vir Braham en vra om op sy poslys geplaas te word en ontvang sy reisbeskrywings direk van hom af! e-pos : info@explore-sa.com

Luister elke Saterdagoggend net na die agtuur nuus op die Afrikaanse radiodiens van RSG na Braham van Zyl en Amoré Bekker se agterpad geselsies op die program Brêkvis met Bekker. 

Die Belg hoor hy is verplaas na Suid-Afrika en is baie ontsteld daaroor, want hy het gehoor van al die moorde, diefstal en skakings. Toe hy agterkom die ou wat langs hom in die kroeg sit, is 'n Suid-Afrikaner, vra hy hom dadelik uit. 'Nee, man, ou pel,' sê die Suid-Afrikaner, 'Suid-Afrika is 'n lekker plek om te bly. Jy kan gratis vir jou 'n huis enige plek gaan opslaan, jy hoef nie te kan lees en skryf om matriek te slaag nie, en as jy jou werk verloor sluit jy aan by die ANC en word 'n parlementslid.' 'En,' vra die Belg, 'wat voor werk doe je?' 'O, ek?' sê die Suid-Afrikaner, 'Ek is die rear gunner op 'n broodafleweringswa.'

Ek is betrokke by hierdie inisiatief van Elsabé, kyk tog asseblief of julle nie ook 'n bydrae kan maak nie, besoek ook hulle webwerf. 

Nuusbrief 28 Januarie 2007

Goeiemôre vriende,

Met Januarie maand agter die rug, is die rustyd verby en moet ons nou weer inspring en al ons verpligtinge nakom. Ek glo en vertrou dat almal soort van "herstel" het na die kersseisoen en die platsak eerste maand van die jaar!

Die projek het ook darem die eerste maand soort van oorleef - maar nou moet ek weer hard werk om fondse, klere, kruideniersware en al die nodige in te samel.

Ek het vir eers nie donasies gevra vir skoolfonds en skoolbenodighede nie, want ek glo die ouers moes eers self probeer om in die kinders se behoeftes te voorsien. Maar soos ons weet is dit nie vir almal moontlik nie en is daar baie kinders wie se skoolfonds en ander skoolgelde nie betaal kon word nie. Ek glo en vertrou dat ons die fondse sal bymekaar kry om hulle hiermee by te staan. Dit bly 'n groot verleentheid vir 'n kind as sy gelde uitstaande is en hy nie alles het wat hy nodig het nie!

Verder moet ons ook nou help om elke middag vir ± 221 kinders 'n middag-ete te gee! en by die Bloudakkies ouetehuis is daar 163 bejaardes wat staatmaak op 'n bord gekookte kos elke Dinsdag. Hiervoor het ons letterlik tonne kos nodig!

Die matriek meisie wat met 'n onderskeiding in Engels geslaag het wil bittergraag 'n rekenaar kursus volg. Ek sal hierdie week presies weet wat dit gaan kos. Ek gaan haar inskryf want ek glo dat ons borge sal kry daarvoor! As ons haar rekenaargeletterd kry is haar kanse op 'n beter toekoms baie goed!

BELASTING
Ek het begin met die uitreik van belasting kwitansies. Indien u 'n belasting kwitansie verlang vir donasies wat verlede jaar gemaak is,moet u asb so gou as moontlik vir my 'n skrywe/faks stuur met die datums en bedrae van die donasies, asook volle besonderhede en posadres. As u alreeds gestuur het, herinner my net asb weer.

Ek pos dit graag.

BELASTING PROBLEME???
Te veel verdien - en moet nou baie belasting betaal - ONS HET DIE OPLOSSING!!

Ons is 'n geregistreerde Artikel 18A (PBO - public benefit organization) wat beteken dat persone wat vir ons projek meer as R1000-00 skenk dit van hul persoonlike belasting kan eis.

Hiermee inligting soos in die SARS "Tax exemption guide For PBO's in South Africa " Bladsy 10 : 12.3

Deductions of donations

A taxpayer making a bona fide donation in cash or kind to a section 18A approved organisation is entitled to a deduction from his taxable income if the donation:-

1. Is supported by the necessary receipt issued by die organisation; and

2. Does not exceed 5 % of the taxable income of the taxpayer, calculated before allowing any deductions under section 18A or any deduction for medical and dental expenses

Ons PBO nr: 930018872 - Ek het die formele kwitansies om hiervoor uit te reik

DEBIETORDERS

Wil U graag op 'n maandelikse basis 'n kontant bydrae maak maar nie altyd tyd het om bank toe te gaan nie? Aangeheg is 'n debiet order vorm wat U kan invul maar onthou asb om onderaan die vorm die Danville Hulp Projek se naam te skryf voordat U dit deurfaks na Stratcol - Anders gaan die geld nie by ons uitkom nie.

WEEREENS BAIE DANKIE AAN AL ONS ONDERSTEUNERS WAT HELP OM 'N VERSKIL IN ONS MINDERBEVOORREGTE BEJAARDES EN KINDERS SE LEWENS TE MAAK - Weet asb altyd dat dit opreg waardeer word.

Groete

Elsabe

Bankbesonderhede:

Danville Hulp Projek
FNB - Brooklyn
Takkode:- 251 345
Tjek rek: 620 546 34128
Swiftkode: FIRNZAJJ926

Aflewerings adres:-

286 Cliffendale rylaan
Faerie Glen
Tel 012 991 3914 Sel 082 8282 551
E.pos - elecnet@mweb.co.za
Webwerf: www.danvillehulp.co.za
PS Bel asb voor jy ry
 

Vlugkaartjies en hotelle

Vergelyk die rederye, kry die billikste pryse en bespreek dan  hier
.

Resepte

Rooibok potjie

1 kg rooibokvleis in blokkies gesny
4 geelwortels, in skyfies gesny
2 knoffelhuisies, fyn gedruk
250 g spekvleis, gekap
6 aartappels, in skywe gesny.
125 ml olie
2 uie, in skywe gesny
10 ml gekapte tiemie
500 ml port of droë rooiwyn

Verhit olie in swartpot en soteer geelwortels, uie en knoffel totdat uie deurskynend is.
Voeg tiemie, vleis, spekvleis en port by. Prut 2 uur baie stadig met deksel op. Voeg
aartappels by en prut nog 30 tot 45 minute. Sit voor saam met mieliepap.

Souskluitjies in 'n Ysterpot

125 g botter of margarien
60 ml fyn appelkooskonfyt
12.5 ml koeksoda
500 ml koekmeelblom (gesif)
knypie sout
100 ml melk
750 ml kookwater
250 ml suiker
5 ml vanieljegeursel
klontjie botter (ekstra)

Smelt botter en roer dan eerskonfyt dan koeksoda by (mengsel bruis). Voeg meel en sout beurtelings met melk by. Plaas oorblywende bestanddele in ysterpot en laat opkook. skep lepelsvol deeg in kokende vloeistof sodat hpies nie opmekaar lê nie. Sit deksel op en prut vir 25 minute lank. Bedien warm, stip met botter.

Wors-en-Niertjie Potjie
genoeg vir 10

50 ml olie
25 ml botter
3 groot uie (gekap)
12 lamsniertjies ( middeldeur gesny, vliese en kerns verwyder)
50 ml koekmeelblom
5 ml sout
varsgemaalde swartpeper
12.5 ml tamatiepasta
200 ml hoenderaftreksel
50 ml droë wit wyn
8 varkworsies middeldeur gesny
200 g sampieone
50 ml brandewyn
12.5 ml gekapte pietersielie

Plaas olie en botter in driepootpot en verhit oor warm kole. Voeg gekapte uie by en roer vir 3 minute..
Rol niertjies in 'n mengsel van koekmeelblom, sout en peper en voeg by die uie in die pot. Voeg res van die bestanddele behalwe die brandewyn en pietersielie by en laat oor matige kole gaar word sonder om te roer. Wanneer niertjies gaar is, voeg brandewyn en pietersielie by, roer een maal om en dien op.


Afvalpotjie

2 klompe skappens (goed skoongeskraap)
water om in te kook
250 ml halfsoet wit wyn
sap van 1/2 suurlemoen
sout en varsgemaalde swartpeper
1 skaapnek
6 groot uie (gekap)
12 klein aartappeltjies
25 ml matige sterk kerriepoeier
2 ml rissiepoeier
10 ml donkerbruin suiker
asyn om mee aan te maak
250 g droëperskes

Sny pense in blokkies en plaas in driepootpot saam met water, wyn, suurlemoensap, sout, peper en skaapnek. Sit deksel op, plaas pot oor matig warm kole en laat koook tot inhoud sag is - ongeveer 3-4 uur.
Wanneer pensblokkies sag is en vleis van nekwerwels afval, verwyder nekwerwels, voeg uie en aartappels by inhoud en kook nog 30 minute lank.
Maak kerriepoeier, rissiepoeier en suiker met asyn aan en voeg saam met perskes by inhoud van pot. Sit deksel op en plaas weer op vuur vir 30 minute. Roer goed om en dien op.

Skaapskenkelpotjie

100 ml olie 2 kg skaapskenkels
'n halwe groen soetrissie, gekap
1 groot ui, gekap
2 knoffelhuisies, gekneus
6 swoerdlose spekrepe, gekap
2 middelslag tamaties, gekap
2 biefekstrakblokkies
sout en swartpeper na smaak
250 ml witwyn
250 ml kookwater
5 wortels, geskil, in skywe gesny
12 klein aartappeltjies, gewas
5 murgpampoentjies, in skywe
400 g sampioene.

Verhit olie en braai vleis tot bruin. (Hoe bruiner die vleis gebraai word, hoe bruiner en ryker sal die sous wees.) Voeg die groenrissie, ui, knoffel en spek by en braai tot begin verbruin. Voeg tamaties by en roerbraai vir 5 minute. Voeg biefekstrak, geur- middels, witwyn en kookwater by en prut vir 'n uur. Voeg wortels en aartappels by en laat vir 20 minute prut. Voeg laastens die murgpampoentjies en sampioene by en laat vir 15 minute prut. Vul vloeistof aan, indien nodig.

Wenk: Moenie potjie tydens gaarmaakproses roer nie. Sit voor met rys, koring of potbrood.


Hoenderpotjie

Gebruik 'n nomber 3 Potjie.

1 Kg hoender (Gemiddelde gewig van ‘n normale hoender).
Fyn Sout
Growwe Swart Peper
Koekmeel om stukkies in te rol.
Uie fyn gekap(2 middelslag)
Kook rys apart tot gaar.
Gemmer en Knoffel (Fyngemaak). (2 Teelepels). Polo Kwane handelmerk

Bestanddele vir die Sous

Tamatiesous(300ml) Koo Handelmerk
Blatjang(50ml)Wellington Handelmerk
Worchestersous(20ml)Mrs.Balls Handelmerk
Tabascosous(2ml)
Asyn(50ml)
Suiker(50ml)
Mostertpoeier(5ml)
Paprika(15ml) Robertson Handelmerk
Water(125ml)

(Voeg alles bymekaar is 'n bottel (1 liter plasties Coke bottel) en meng goed deur die bottel te skud.

Metode
Stap 1.Maak jou pot warm en gooi jou botter (egte) by (20ml).
Stap 2. Braai die fyngekapte uie en Gemmer/Knoffel (2 teelepels) tot die geur uitkom.
Stap 3. Neem die hoender porsies en strooi individueel een vir een met fyn sout en peper.
Stap 4. Nadat die gedoen is doop die hoender porsies in die koekmeel en voeg in die pot.
Stap 5. Roer totdat die hoender porsies goed met die uie en olie bedek is vir so 10 minute met die deksel oop. Gebruik 'n houtlepel. (Die reuk sal jou nou al reeds honger maak .

Van nou af roer jy nie weer jou pot totdat jy opskep nie.

Stap 6. Gooi nou jou sous soos bo saamgestel in en laat jou pot stadig loop. (Borrel liggies regdeur). Kyk gereeld na die pot vir 15 minute.
Stap 7. Voeg nou jou groente in lae in die volgende volgorde. 10 klein Aartappels, 10 jong wortels, 10 klein tipe pampoentjies,
Stap 11. Een pakkie "button" sampioene na smaak vir die laaste 45 minute
Stap 12. Voeg klaargekookte rys by so 10 minute voor opskep, en laat die sous deurkook.

Die pot loop so 2 1/2 uur.

Stap 13. Kry vroulief om die aartappels te toets of dit gaar is en vra haar sommer na die sout inhoud.
Die verskillende handelsmerke wat aangetoon word werk volgens my die beste om die smaak uit te bring.
Stap 14. Skep op en geniet die Rooi Hoender.
Ek het nog nooit iemand gekry wat nie van die potjie gehou het nie. Almal maak die resep sy eie.


Hoender-biltong-en-spekpotjie

Sous
2 hoenderaftrekselblokkies
250 ml (1 k) kookwater
500 ml (2 k) droë witwyn
250 ml (1 k) blatjang
46 g sampioensoppoeier (1 pakkie)
5 ml (1 t) gedroogde tiemie
5 ml (1 t) gemengde gedroogde kruie
5 ml (1 t) suurlemoenpeper

Hoendergereg
15 ml ( 1e) olyfolie
15 ml (1 e) botter
12 hoenderdye, ontvel indien verkies
250 g spekvleis, gekap (1 pakkie)
50 ml Brandewyn
10 ml (2 t) gekapte knoffel - opsioneel
2 uie, in ringe gesny
1/2 groen soetrissie, grof gekap
1 seldrystringel, in dun ringe gesny
20 klein aartappeltjies, geskil
4 wortels, skyfies gesny
12 klein uitjies, heel
250 g knopiesampioene
8 murgpampoentjies, in dik skywe gesny
150g klam beesbiltong, gekerf
250 ml ( 1 k) gerasperde Cheddarkaas
125 ml (1/2 k) vars, gekapte pietersielle

Metode - Sous
Los die aftrekselblokkies in die kookwatr op. Meng die res van die bestanddele vir die sous en boeg dit by. Hou die sous eenkant.

Hoendergereg
Verhit die botter en olie oor matige hitte en verbruin die hoender daarin. Voeg die spekvleis by en soteer dit 3 minute lank. Voeg die brandewyn en knoffel by. Roer dit deur en moet daarna nie weer roer nie. Strooi die uie, soetrissie en selderu oor die hoender en plaas daarnedie aartappled en wortels bo-op.
Giet die sous oor: Plaas die deksel op en lat dit 1 duur lank prut. Voeg kookwater by indien nodig.
Bedek dit en laat prut dit 20 minutes lank. roer dit net voor bediening en strooi pietersielie oor.

Siiktes (Frouelikke)

Seer tépels - 'n Stukkiwas met soetolie en haarlemmeroli, en 'n stukki kliphoutgom, dit alles dit alles deurmakaar smelt en ansmeer.
Twee eetlepels Frans brandewyn met suiker by, ansmaar.
Fan harpuis, was en olie 'n plyster maak.
Met ongesoute botter smeer.

Fark Bout met Fulsel

Maak lang kerwe oer di bout, omtrent 'n finger fan makaar, was skoon af, sny 'n snit in by di kneukel, maak di fel daar los en ful met fulsel, smeer di bout met botter of fet, laat braai met 'n klyn bitji peper en sout, smeer baing, anders blaar dit.

Al Anna se resepte is in eBoek formaat en maak dus ideale geskenke en word sommer met epos gestuur. Vir meer besonderhede, klik hier

Die resep hieronder kom uit Anna se eBoek - Onthou jy nog.  Skaf dit gerus aan!

Iemand vra my nou die dag vir 'n resep vir Tuisgemaakte Kondensmelk, ek kry toe hierdie een in Anna se boek:

TUISGEMAAKTE KONDENSMELK

1.25 liter melk
2ml koeksoda
500g suiker
3ml sout

Voeg alle bestanddele bymekaar en roer oor lae hitte totdat die suiker opgelos is. Kook stadig totdat die melk soos dik room begin lyk. Moenie roer nie, tensy melk wil oorkook. Gooi in flesse wat gesteriliseer is en plaas vir 15 minute in voorverhitte oond van 120C. Skroef daarna dadelik toe.

st se  pitkos

Klik hier om st se webwerf te besoek
en om in te teken op sy weeklikse nuusbrief

“Die weeklikse nuusbriewe van Dr Potgieter is my dosis lewens vitamiene en het weer kleur en motivering vir my lewe gegee” – ‘n leser.

Nog gevleuelde woorde van ST:

Vrydag die 13de

Ek word gevra om ‘n praatjie te kom doen by ‘n Hoërskool. Op Vrydag die 13de. Die radioprogram Monitor van RSG vra my om ‘n radio-onderhoud te doen. Ook op Vrydag die 13de. En die onderwerp van die radio-onderhoud: Vrydag die 13de.

Die praatjie (per telefoon vanuit Johannesburg) geskeduleer vir 07:50. Die praatjie in die skoolsaal geskeduleer vir 08:00. Ek maak gebruik van my “time management skills” en reël dus met die hoof van die skool persoonlik dat die omroeper van Monitor my direk by die skool skakel en ek dadelik daarna my praatjie in die saal kan doen. Vra hom ‘n stil kantoor. Geen probleem nie, verseker die meneer my. Alles sal in orde wees. Ek praat en reël ook met die juffrou wat die praatjie organiseer.

Vrydagoggend is ek betyds by die skool. Juffrou lei my na die kantoor waar ek moet praat. Telefoon is daar, die dames by die skakelbord is in kennis gestel dat RSG gaan skakel. Alles reg en in plek. Ek is gereed om vrae te antwoord en insette te lewer oor Vrydag die 13de en die sielkundige effek daarvan op die mens.

Die telefoon lui – dis die omroeper van Monitor. Tel die sekondes af voor ons op die lug gaan. Net toe ons begin praat, besluit die hoof van die skool hy wil nóú op die interkom praat. En hier sit ek in hierdie klein kantoor, met die hoof se stem wat bulder oor die interkom sodat ek nie die omroeper oor die telefoon kan hoor nie. Ek bedoel soos in feitlik glad nie. Die luidsprekerkassie sit hoog teen die muur in die kantoor. Wat kan ek doen, vasgevang in die kantoor en ons is lewendig op die lug? En intussen klop ‘n ander onderwyseres om in die kantoor te kom. En maak die deur oop en loer rond. Ek kan nie dink nie, ek kan nie die omroeper hoor nie, want die hoof praat aanmekaar hard en luid. Dit word ‘n NAGMERRIE in hoofletters!!

Ek het al redelik baie onderhoude op radio gevoer met goeie sukses, maar hierdie onderhoud is ‘n absolute fiasko – ek voel geweldig ontsteld oor die voorval! Moet ek die fiasko blameer op Vrydag die 13de of is dit bloot onkunde of onbevoegdheid van ‘n instansie wat nie bekend is aan die praktyk van ander instellings buite ‘n skoolomgewing nie?

Die juffrou kom vra groot verskoning. Vra selfs of die skool vir Monitor ‘n brief moet skryf om te verduidelik en apologie aan te teken. Ek is platgeslaan maar moet dadelik myself hergroepeer en my emosies onder beheer kry vir die praatjie in die saal.

Tot vandag toe het ek nie veel erg aan bygelowe gehad nie, maar is hierdie nie ‘n bewys van die spook van Vrydag die 13de nie?

Sal ek weer op ‘n Vrydag die 13de op die radio praat? Hoe moet ek hierdie slegte gebeurtenis verwerk en hanteer?

Ek doen die volgende:

· Ek sal my nare ondervinding nie aan Vrydag die 13de toeskryf nie, maar eerder aan ander faktore.
· Ek sal weer op die radio of waar ookal praat op Vrydag die 13de. Net om die punt te staaf dat ons nie uitgelewer is aan allerhande bygelowe nie.
· Ek sal nie vashaak by hierdie teleurstelling en terugslag nie, maar steeds net my beste doen. Môre skyn die son weer en die genade van die Here is immers genoeg vir my.
· Ek sal die humor in die situasie probeer raaksien, want om te lag is goed vir jou gesondheid en salf vir jou seer gemoed.

Dit bring my by die punt waarom ons in ‘n moderne tyd nog so bygelowig is? Hoekom is dit dat vele hotelle nie ‘n dertiende vloer het nie – daar moet blykbaar ‘n lugleegte wees tussen die twaalfde en veertiende vloer. En kyk maar hoeveel hysbakke het nie ‘n nommer 13 knoppie om te druk nie. Selfs sommige hospitale - wat veronderstel is om ‘n rasionale wetenskaplike plek te wees – het nie ‘n teater nr 13 nie.

Hoe het die bygeloof van Vrydag die 13de onstaan? Wel, daar is nie sekerheid daaroor nie. Blykbaar kom dit voor van baie lank gelede - daar word byvoorbeeld in die Noorse mitologie ‘n fabel vertel van ‘n maaltyd vir twaalf mense met ‘n dertiende persoon wat opdaag en die dodelike gevolge daarvan.

Die bekendste voorbeeld is egter die laaste maaltyd van Jesus voor sy kruisiging. Tradisioneel word dit as ‘n Vrydag beskou, hoewel sekere skrywers meen dit was ‘n Woensdag. Dus dertien mense op ‘n Vrydag sit aan by ‘n maaltyd. En een van hulle is Judas die verraaier. Dit is ook Judas wat eerste opstaan en uitstap. En dit is ook Judas wat eerste dood is.

· Wat is volgens jou ‘n bygeloof? Hoe ontstaan dit?
· Het jy ‘n bygeloof?
· Is gelukbringers ‘n vorm van bygeloof ?
· Is daar in die morderne tydsgewrig nog plek vir bygelowe?
· Hoekom dink jy het mense bygelowe?
· Is daar sielkundige redes vir ‘n bygeloof?

Ek hoor graag jou kommentaar op hierdie vrae en enige ander ondervinding wat jy het met betrekking tot bygelowe wil deel.

‘n Sprankie wysheid vir die dag
“As ‘n mens nie leer om vir jou probleme te lag nie, sal jy niks hê om voor te lag wanneer jy oud word nie.” – Ed Howe

Dr ST Potgieter
Tel: 021 949 5007
Sel: 083 227 3683
Epos: st@pitkos.co.za

Soek jy plek om te gaan kampeer? Klik dan hier!

Skooltake?? Klik hier

Vakansieverblyf is altyd 'n probleem, dié mense maak dit makliker om te kry, klik net hier.

Teken hier in op die poslys en lees ook die argiewe.

Om uit te teken, stuur vir my 'n epos en dui jou naam aan asook die eposdres waaronder jy ingeteken is

Kontak my hier.

Jy kan ook nou kommentaar lewer op die nuusbriewe, klik net hier en laat jou boodskap

Druk jou speld op my besoekerskaart!