Onbeskaamd Afrikaans!

Welkom aan alle nuwe intekenare!

Hierdie is die laaste Patriot vir 2007. Hy sal weer terug wees in 2008! Ek wil graag alle intekenare 'n Geseënde Kersfees en voorspoedige 2008 toewens! Dankie vir die ondersteuning oor die jare, ek waardeer dit regtig.

Ons was toe vir 'n paar dae Mapungubwe toe gewees. Iets heel anders as Kruger, byvoorbeeld. Lekker bebos (en warm) en mooi. Maar lees die storie hieronder.

Die resepte die keer is 'n mengelmoes van persoonlike gunstelinge en ander lekkernye, gaan kyk gerus hieronder.

Net om te laat weet dat ek enigiets wat ek in my epos ontvang en wat ek voel hier geplaas kan word, dit plaas ek. As daar dalk kopiereg op is laat weet my, dalk haal ek dit af.Tuisgebakte brood so warm uit die oond is darem maar BAIE lekker, ek het so 'n paar broodrespte wat julle kan gaan probeer, gaak kyk gerus verder na onder....

Weereens het ek lekkerlees Afrikaanse artikels deur onder andere Minette Brink, Estelle de Bruyn en Annelie Botes. Ek is seker julle sal dit geniet!  Ook is daar 'n insiggewende artikel deur Dr. S T Potgieter.

En onthou tog om my besoekersboek te teken? Hy was vir 'n hele tydjie aflyn maar is nou weer terug.

Net een miljoen? Komaan, vat 'n kans op die UK Lottery, dis veilig en die geld  is noemenswaardig, baie beter as ons plaaslike Lotto. Jy kan nie wen as jy nie 'n kaartjie het nie!

 Klik hier om jou kaartjie te kry en droom GROOT.

Is daar dalk van julle wat ook die verrigtinge daar gaan bywoon? Indien wel, kontak my, dalk kan ons daar ontmoet.

Dit gee my groot lekkerkry dat Rapport vir Maas gepos het. Dit wys vir my dat die stem van die massa tog gewig dra. Dink net as ons daardie massastem kan aanwend om ander omstandighede te verander of te verbeter? Die internet is inderdaad 'n magtige wapen.

Amptenare van die landbank steel 'n biljoen, Departement van Gesondheid onderspandeer R35 miljoen en gesondheidsdienste is haglik. En dis maar 'n druppel in die emmer! Gee my krag! Gee my die goeie ou dae!

Ek sien die koste van die 2010 sokkerstadions nou al met 20% vermeerder het. Dit gaan ons nou al groot geld kos om dit aan te bied. Daar is ook dreigende stakings onder die konstruksiewerkers wat vertragings gaan veroorsaak. As die stakers eers eenkeer gekry het wat hulle wou gehad het, gaan hulle dit weer en weer doen, hulle hou die hef in die hand. Ek voorspel groot probleme!

Die beste uitvindsel sedert gesnyde brood. McCain se Micro Wave Chips. Nie net het dit die hart merk nie, dit is 95% vetvry, is na net 3 minute in 'm mikrogolfoond reg, en beste van alles, dit is regte egte SLAP chips! Probeer dit gerus, dis njammies!!

Matt.9:13 Ek het nie gekom om mense te roep wat op die regte pad is nie, maar die sondaars.

Elke jaar gaan kersfees gepaard met baie besluite. Waar gaan ons wees, wat gaan ons eet en wie gaan wat kry? Met Jingle Bells in jou ore breek die frustrasie van nog 'n jaar se kersfeesinkopies aan. Jy en jou vrou is al klaar kwaad vir mekaar nog voor die eerste geskenk gekoop is.

As jy soos ek sukkel met geskenke, lees hierdie verhaal en gee dit vir iemand weg voor dit te laat is!

Waarheen is jou skip van drome oppad?

Sy het bekend gestaan as die skip van drome. Sy was agt honderd en negentig voet lank. Veertien duisend mense het aan haar gebou. Die anker het vyftien en half ton geweeg en is deur twintig perde van die fabriek af tot by die skip getrek. Die binnekant van hierdie skip het tien maande geneem om te voltooi, al te saam 'n paar mijoen ure se werk aan Louis Quinze, Klassieke Versailles en Victoriaanse versierings, Crown Berger skilderye, Franse kaffees en Turkse baddens om maar net 'n paar op te noem.

Sy is ook genoem: Die onsinkbare skip en in 'n koerant van 1912 word berig dat selfs God haar nie kan sink nie.

Maar op Sondagaand 12 April 1912 sink die Titanic binne twee ure en neem 1500 lewens saam na haar watergraf.

Tydens hierdie twee ure het interessante verhale afgespeel.

Daar was te min reddingsbote. Die rykes en vernames het gesorg dat hulle eerste plek kry.

Later het die Kaptein oor sy megafoon afgekondig dat net vrouens met babatjies plek op die reddingsbote mag kry. 'n Man met 'n b abatjie in sy arms het verby 'n vrou gehardloop wat nie 'n k! ind geha d nie. Vir haar was die afkondiging 'n doodsvonnis.

Skielik het haar situasie verander toe die man sy kind in haar arms sit en sê: Dit is joune...hardloop vir jou plek op die reddingsboot!

Wat is jou grootste Kersgeskenk?

Ons is almal daarvan bewus dat ons lewensvaart iewers soos die Titanic gaan sink. Ons is ook bewus daarvan dat almal nie in hierdie lewe die reddingsboot van Jesus gaan haal nie.

Met Kersfees kom sit God opnuut weer sy kind in jou arms en sê: Dit is joune... hardloop na my reddingsboot.

Moenie wag tot dit te laat is nie. Wanneer 'n skip sink word lug uitgeblaas en water ingesuig. Wag jy tot dit te laat is word jy saam ingesuig al spring jy. Die meeste mense wat hulle lewe in die Titanic ramp verloor het, het nie verdrink nie maar verkluim.

Wie wil in koue water ronddobber as Jesus reeds vir jou 'n plek op sy onsinkbare reddingsboot voorberei het?

Stuur die geskenk aan:

Miskien is daar iemand waar oor jy baie bekommerd is of wonder waar hulle wel-vaart hulle aan die einde van nog 'n jaar gebring het? Miskien sukkel jy ook soos ek om geskenke te koop en wonder wat jy vir die of daai een sal koop hierdie jaar. Ek gee jou toestemming om hierdie kersfees-reddingsverhaal aan te stuur. Stuur dit aan as 'n geskenk. Sit Jesus in die arms van mense wat oopoë besig is om te sink.

Dit is na alles waaroor Kersfees gaan.

"Sonder Jesus is 'n vyftien en 'n half ton anker te lig en 70 000 oorvol skip te swaar"

Hierdie brief is maar net 'n klein deel van die Peterjasie internet ondervinding. Klik gerus hier en gaan besoek my webwerf, daar is regtig iets van alles, en alles in Afrikaans.

My Kersresepte eBoek is nou klaar, gaan laai dit gerus af by Pasella hieronder. Geniet dit!!

Vroegdag, nog voor die Albertonse mossies ons kom wakker hoes, was ons al oppad Mapungubwe toe. Glimlaggend sien ons hoe die Pretorianers kruip op die Ben Schoeman om te gaan werk in Johannesburg. Daar is definitief voordele aan om op kierieverlof te wees!
Die plan was om die amper 500 kilometer Mapungubwe toe af te draf en so vroeg moontlik die tent opgeslaan te hê. Dit was vroeg November en al lekker warm in die Noorde.
Hoe nader ons aan ons bestemming kom hoe warmer word dit en toe ons by Mapungubwe se hek indraai besluit ons om liewer in een van hulle tente te gaan bly as ons eie een. Die weerburo het ook reën voorspel en ons kon aan beter dinge dink as om nat kampeergoed op te pak. Ons kry toe vir ons een van hulle luukse tente by die Limpopo Forest Tented Camp.
Luuks was die tent inderdaad. Slaapgegeelte met badkamer, stoep en klein kombuis wat selfs met ‘n mikrogolf oond kon spog.
Tent bly maar tent, en binne meet ons die temperatuur op ‘n lekker warm 40 grade C. Die dakwaaier doen sy bes om ‘n koel luggie te probeer sirkuleer.Tente 2, 5 en 6 kry die meeste koelte en 5 en 6 is ook by die watergat, onthou dit as jy dalk wil bespreek. Daar is ook ‘n klein swembadjie met elektriese draad omhein, glo omdat die olifante dit kom leegdrink!
Waar ons oorspronklik vir vier dae in die Mazhou kampeerterrein bespreek het, het ons dit nou verander na twee dae by die Limpopo kamp en twee dae in die Leokwe hoofkamp in een van hulle chalets. Mapungubwe is in twee gedeel deur privaatgrond en bestaan uit ‘n Oostelike deel en Westelike deel. Limpopo kamp is in die Westelike deel en Leokwe in die Oostelike deel, dit gee nou vir ons twee dae in elke deel van die park.
Paaie in die Park is redelik en daar is ook 4X4 roetes op die kaart aangedui. Die Maloutswa Voël Skuiling is 3 kilometer van die kamp af en voëlkykers kan ‘n paar uur daar deurbring en ‘n hele paar voëlspesies besigtig of afneem. Paaie is meestal twee-spoor in die deel van die park maar heel rybaar en kronkel tussen bome en bosse en gee jou ‘n regte weg-van-alles gevoel.
Die Mazhou kampeerterrein is so ‘n kilometer van die Limpopo Tentkamp. Die staanplekke almal in die koelte en elke staanplek het sy eie krag en waterkraan. Die ablusies is ook baie netjies en skoon.
Mens moet alles saambring Mapungubwe toe. Hier is niks, behalwe water. Geen winkel, geen restaurant, geen telefoon, geen selfoonontvangs, net mooi niks. Al wat ons gesien het wat te koop aangebied word is ‘n pet en t-hemp en blikkieskoeldrank by ontvangs.
By ontvangs het hulle ons meegedeel dat dit ‘n Groot Vier park is, hier is nie buffels nie. In die Westelike deel het ons wel groot kat spore in die pad gesien, maar dis al. Ons het wel heelwat boksoorte en voëls gesien. Limpopo en Mazhou kampe is wel omhein met geelektrifiseerde draadheinings wat seker net bedoel is om olifante uit te hou, enigiets anders kan eenvoudig onder deur loop.
Gedurende ons tweede nag maak die hemelsluise oop en dit sous katte en honde, of is dit nou blouwildebeeste en vlakvarke? In alle geval, ons dank ons sterre dat ons in hulle luukse tent slaap en nie in ons eie tent nie. Die volgende oggend ontwaak ons met voelgesang en die reuk van nat bosveld, wat ‘n begin tot enige dag.
Ons moet egter verhuis na ‘n bungalow by Leokwe kamp en sommer vroeg vroeg is ons in die pad na die Oostelike deel van die park. Ons is egter te vroeg om in te teken en besluit om eers die Tree Top Walk te gaan beloop en ook om na die samevloei van die Shashi- en Limpoporiviere te gaan kyk.
Die Tree Top Walk is ‘n goed geboude wandelpad so tien meter bokant die grond tussen die bome deur met ‘n skuiling wat oor die Limpoporivier uitkyk as eindbestemming. Die bobbejane hou ook vreeslik van die wandelpad en jy moet maar mooi trap so tussen die bobbjaanmis deur. Die magtige Limpopo was droog met net hier en daar poele water.
By die samevloeiing van die Shashi- en Limpoporiviere kan mens van verskeie uitkykpunte fotos neem en ook Zimbabwe en Botswana besigtig.
Teen die tyd was dit al laat genoeg sodat ons by ons akkommodasie by die hoofkamp, Leokwe, kon inteken.
Weereens was ons aangenaam verras met die skoon, netjiese rondawels. Groot slaapkemer, oopplan leefarea, lekker braai area en selfs ‘n opelug stort! Wel gedaan, Parkeraad! Nou moet julle net die plek in stand hou ook!
Die kamp is nie omhein nie en jy word gewaarsku om nie sommer net rond te wandel nie en om jou voertuig te gebruik as jy na die swembad, wat ‘n baie mooi rotspoel is, wil gaan. Weereens ‘n regte “bos” ervaring.
Ons laaste dag breek toe aan met die wonderlike klank van deurdringende reën. Ons verwondering word gou gedemp toe ons besef dat ons op die begeleide uitstappie na Mapungubwe koppie, wat om 7 uur sou begin, bespreek het. Ons verskuif dadelik ons uitstappie tot die een wat om 10 uur begin en gelukkig klaar dit effens op en ons bestyg die Landy wat ons na Mapungubwe koppie sou neem.
Die Mapungubwe omgewing was, volgend geoloë. Tussen 1220 en 1290 bewoon deur on en by 5000 mense. Die koninklikes en hulle gevolg het bo-op die koppie gewoon. ‘n Boer met die van Lotriet, (hy is oorlede in 1917), was glo die eerste blanke wat tot bo-op die koppie geklim het. Hy het ‘n paar kleipotte saam met hom afgebring en van hulle aan sy swart metgesel gegee. In 1932 het ‘n ene Van Graan, wat op ‘n jagtog was, water gaan soek by die ou swartman. Hy is toe water aangebied in een van die kleipotte. Hy herken dit toe as oudhede en probeer toe uitvind waar die swartman die potte gekry het, maar dié het geswyg soos die graf. Die man se neef kon toe met silwer geldstukke omgekoop word en die verklap toe die geheim van Mapungubwe koppie. Van Graan klim toe tot bo en kry nie net kleipotte nie maar ook ysterware en ook heelwat goue artifakte. En die res, soos hulle sê, is geskiedenis! Die artifakte word in die Mapungubwe museum by die Universiteit Van Pretoria ten toon gestel.
Ons klim toe die 149 trappies na bo waar ons gids die geskiedenis van die koppie an ons weergee. Bo op die koppie is nog heelwat tekens dat mense daar woonagtig was, ronde gate in klippes waar graan gemaal was, ‘n gat waar water of graan geberg was en ook ‘n ou bordspel.
Weer by die kamp aangekom begin dit weer reën en ons besluit om die pad te vat huistoe.
As jy nog nie by Mapungubwe was nie, gaan kyk gerus. Ek stel voor nie minder as twee dae in elke deel van die park. As hitte jou pla, bly weg in die somermaande. Die chalets by Leokwe het egter lugversorging as jy in die somer wil gaan. As jy stilte en rustigheid in ‘n bos atmosfeer soek is dit die plek vir jou.

Klik hier om my Mapungubwe fotos te besigtig.

Ek beskou Anna Eksteen as die koningin va Resepte eBoeke in Afrikaans. Sy het nou al 'n hele versameling van resepte eBoeke wat enige kossoort dek, en dit in Afrikaans! eResepteboeke is goedkoop en geen posgeld is betaalbaar nie, die boeke word per epos gestuur en is in 'n japtrap by jou. Klik gerus hier en kyk na haar resepteboeke en bestel gerus een, of sommer 'n paar! As jy besluit om van haar boeke te bestel en jy noem dat jy daarvan hier te hore gekom het, sluit sy my Kampkosresepteboek gratis in!

Nou en dan kry ek 'n bevlieging en dan probeer ek oot iets skryf. Ek kan nie sing nie, so ek probeer maar skryf! Ek hoop nie ek verloor teveel intekenare nie, laat maar weet wat julle dink!

Ek is meegedeel dat een van my artikels onder Blaaskans in die Huisgenoot van 6 Desember sal verskyn, gaan lees dit gerus :-) Kom lewer dan hier kommentaar as julle wil :-)

Ek sien dat Minette die maand 'n artikel in Wegbreek het, 'n Kersfeesstorie, kry die tydskri en lees dit gerus!

Minette het so baie artikels geskryf dat ek elke nou en dan een op my hardeskyf raakloop. Ek het dit daar gebêre sodat dit nie moet wegraak as ek 'n rekenaar "crash" sou beleef nie, en toe vergeet waar ek dit so mooi gebêre het, net om eendag (soos vandag) weer opgespoor te word! In alle gaval, hier is hy:

Lekker lees!

Malgoed

‘Mense sê dag in, dag uit ‘jy’s mal. Jy dink te veel.’
Dis fine met my. Maar soms, net soms, dan wonder ek, wie’t besluit.
Ek ly aan bipolêre disorder, of so iets.
Daai ding wat die oorsprong aan die sêgoete’ eendag op, ander dag af’ en ‘my gedagtes ry wipplank’ gegee het.
Wil nie pille vir die dieper dors sluk nie. Wil nie langer terapie kry nie. Wil die antwoord hê.
En waar sou Dawid die wortels begrawe het?
Op my opdae kan ek vlieg, als verstaan, almal liefhê, als vergewe.
Op my afdae voel ek ………………….
in die middel van die godsverlate vlaktes, sonder hoop, sonder liefde, sonder omgee.
Maar die kinders bly honger en ek wonder, hoe het ons tot hier gekom? Is dit wat Lewe beteken?
Om op en af op deur wie bepaalde dae te vlieg en te pyn? Om waar uit te kom? Om wat vir wie ookal te beteken?
Hoekom doen ek hierdie werk van voorgee? Vir wie, vir wat? Om jam op die tafel te sit, saam met die gee ons ons daaglikse brood?
Vra en vir jou sal gegee word. Rêrig? As ek elke dag van my lewe vra vir los tog daai ge-oorlog, vir oorvloed en insig vir elk, waarom word dit nie gegee nie?
Elke dag rondploeter in bokstront en weeskindersnot in geblikte eidsbesmette skwatterkêmps. Elke dag ‘n bedeltragedie. Wie gee om?
En tussen die laatnag skrywery deur sing jou kind iewers in die agtergrond terwyl sy haar pop poeier gooi en onbewustelik voorberei vir die sirkelgang van mawees’ daar kom Koos die groenteman, virre 5 sent ‘n lemoentjie, virre 10 sent ‘n pampoentjie’ en vaagweg onthou jy iewers dae van ‘n happy son, vrywees en loskopvry, dae van nikse tien plae nie.
En jy sou kon huil, as daar nog gate vir trane was, maar op hierdie afdag is daar niks.
Net gedagtes wat maal oor skoolpêlle se dooie kinders, ander pêlle se daggakop-met-mix lovers wat aand na aand dreig om daai symste koppe weg te blaas, pêlle wat skeef gedraai het en op 40 skytbang vir ma en pa se reaksie op dié onheilse sal wees.
Pêlle wat kleintyd so deur nee, pa, sallie werie, pa, eina, pa, gemoer is dat hulle oë na allie jare nog nie kan sien nie, wil sien nie.
Dieselle ma’s en pa’s wat mekaar gelos het vir jonger, ouer, ryker, mooier modelle, wat mekaar dik timmer na ‘n papsak, ‘n witsnuif, een verkeerde kyk. Wat Sondag in die kerk sit, mekaar se hande angsbevange klem, diktaai trane huil oor die…wat nouweer? Want die koppe maal alklaar oor v’middag se braaivleis en het die bitch onthou om Blitz te koop, gaan hy maak soos laas se Sondag se middagslaapseer….
Ek wil nie meer glo in die maak die wêreld ‘n beter plek nie. Die symste wêreld wat die annerdag nog perfek aanmekaar getimmer is, sonder ‘n papsak se hulp.
En wie het dit anders gemaak, verdraai soos dit ons-is-die-sterkste pas? Onse kerk se mense. Onse slimme weetals. En soos Amanda Strydom sing, my lam, kyk hoe lyk ek nou…”
Maizie haal asem en kyk met niksverwagtende oë na haar nuwe kopdokter. Dié is grond-dom stil. Na ‘n paar ure sê hy tranerig, welkom by die klub, Maizie, en probeer die medalje van erelidmaatskap aan haar hartseer bors steek.
Grys en stil, die lug.
“Ek wil dit nie hê nie, sug Maizie en haak haar sak van die vloer af.
‘Ek loop dan liewers alleen. Want na alles verstaan julle nog minder as my niks…’

Klik hier vir nog Minette artikels

Maroela Boeke en Tierberg Boeke - Laai gerus hulle nuutste katalogus af en kyk daardeur. Hulle het 'n besonderse versameling boeke. Ek het al self van hulle bestel en hulle diens is uimuntend. Regs klik hier om die katalogus af te laai

Die BEF het kennis gekry van verskeie studiebeurse en werksgeleenthede wat beskikbaar is, vir meer besonderhede, kontaknommers is hieronder.

Regs klik ook hier om die nuutste nuusbrief af te laai.

Sluit nou aan. Maak 'n verskil. Klik hier vir meer inligting

Kontakbesonderhede:
Mnr. Andre Groenewaldt – 082 633 2920 & landlyn: 012 548 6118
Mnr. George Pienaar – 082 338 3295
Faks: 012 548 7242

Hierdie gaan nou 'n gereelde item word. Ek is bly om te sien dat die Boeremusiek tradisie nog so sterk staan....

Hendrik Susan

Bron: 15 Goue Jare:  1989-2004  Boeremusiekgilde  

Regs klik hier om die resepte eBoek met Kersresepte wat ek saamgestel het, af te laai.

Peterjasie se Groot Afrikaanse CD

Ek het my mees populêre eBoeke op een CD saamgevat. Die Tradisionele SA Resepte, die Kampkosresepte, die Wille samies en die Boererate is almal daar. Die CD maak 'n ideale geskenk maar ook 'n besonderse aandenking.

Die CD verkoop vir R100, posgeld ingesluit, stuur vir my 'n epos vir betalingsbesonderhede.

Dan het ek ook 'n resepte CD in Engels. Die CD bevat meer as 50 volledige resepteboeke en maak die ideale geskenk. Dink net, die ontvanger hoef nooit weer 'n respteboek te koop nie. Prys is R100 wat uitwerk op R2 per resepte eBoek, is dit nou 'n winskopie, of wat? Klik hier vir betalingsbesonderhede.

Kom ons skop oudergewoonte af met Estelle se bydrae. Sy is verbonde aan die Republikein, die enigste Afrikaanse dagblad in Namibië. Kontak haar gerus, sy hoor graag van julle.

EKSAMEN

VIR baie jare in my lewe kon ek nie verstaan hoekom die geur van lentebloeisels en die verskyning van die eerste sagte lemmetjiegroenblaartjies aan die vrugtebome my tot so 'n diep depressie kon stem nie. Tot eendag.
Skielik het ek besef dat dié tyd van die jaar vasgeanker is in my wese as eksamentyd, 'n tyd om te leer en nie jou neus by die deur uit te steek nie: 'n tyd van stres.
Eksamenskryf bly een van die grootste stresfaktore en tot vandag toe is die nagmêrries wat soms in my drome insluip, dié van in 'n eksamenlokaal instap om 'n geskiedenisvraestel te skryf en dan te moet agterkom dat ek eintlik Engelse letterkunde moes geleer het, want dis is wat ons skryf.
Vir die pligsgetroues en die hardwerkendes wat regdeur die jaar hul studies ernstig opneem, wat die dag se werk sommer nog dieselfde aand opsom en in die eksamen-voorbereidingslêer liasseer en dit gereeld deurgaan, is eksamens seker 'n vulletjie. (Ek ken nie sulke mense nie, maar ek het al van hulle gehoor.) Vir ons gewone sterflinge wat dinge maar rustig vat en staatmaak op bloktyd en die oop dae op die eksamenrooster tussen vakke, is dit 'n ander storie.
Boonop was ek nog immer die meester van die uitstel-tegniek gewees. Eksamentyd was dus die tyd wat ek my kamer geskuif het, my kaste van hoek tot kant uitgepak, uitgewas en reggepak het, in kleure gekoördineer en in hopies van maer en vet klere uitgesoek het. Dit was die tyd voor e-pos en gevolglik het eksamentyd by my 'n diep behoefte laat ontstaan om lang briewe vir al my penvriende te skryf en hulle op die hoogte te bring van die verwikkelinge in my lewe sedert ek laas (met die vorige eksamen) met hulle gekorrespondeer het.
In eksamentye is my hond meer gebad as in enige ander tyd van die jaar en as my ma net gelyk het of sy sou ja sê, sou ek waarskynlik die “Kook en Geniet” van hoek tot kant deurgekook en gebak het as verskoning om nie by die boeke uit te kom nie.
Wat my die heel kwaadste op aarde kon maak, was my pa of ma wat my subtiel (en soms minder subtiel) aangemoedig het om agter die boeke in te skuif en asseblief tog net ‘n bietjie te leer. Dis nie dat ek nie besef het dat ek moet leer nie, dis net dat hul versoeke om my studies ernstig op te neem, die rebel in my ontketen het en my weer die klere uit die kas laat pak het, om dit van voor af reg te pak of die hond geroep het om weer te bad.
Vandag is ek in my ma se bootjie. Ek is die een wat subtiel (en minder subtiel) die eksamenskrywertjie in my huis tot studie moet aanspoor. En ek hoor my ma se stem as ek my mond oopmaak.
"Moet jy nie bietjie gaan leer nie?" "Hoe ver is jy met jy leerwerk?" "Het jy nog baie werk oor?" en natuurlik: "My magtig, lig jou agterent van die bank af en gaan leer nou en sit die blêrrie selfoon af!"
Ek sou so graag die mamma wou wees wat net Milo aandra en die immer studerende vlytige leerling aanmoedig om 'n breek te vat en bietjie te rus.
Maar helaas.
Vir al die leerlinge in al die skole in ons land wat nou eksamen skryf, kan ek innige simpatie en alle sterkte toewens. My hart is met julle en ek voel vir julle. En vir die ouers van ons eksamenskrywendes kan ek net ewe veel sterkte toewens. Ons verdien dit.
 

Met skryf is dit jy en jy alleen

As ek nie vandag se dag by skrywersblok kom nie, kan ek dit los. Maar ek wil nie lang stories praat nie. Skrywersverstopping is een en dieselfde as lewensverstopping, en daar is vier onkruidsade waaruit die verstop-bossie welig groei. Luiheid. Kennisloosheid. Die verkwanseling van ‘n leuen. ‘n Gedurige rondkykery vir ‘n blameerbare sondebok. Ek gaan nie preekmaak daaroor nie. Skryf met ‘n koki 4 sleutelwoorde agter die toiletdeur. Elke keer met sittyd, kan elke man sy eie preek skryf en sy eie teksvers onderstreep. Om by onderstreep vas te haak, gaan egter te min wees. Dan moet die werke van die hande inskop. En ek waarborg: Eergister, toe dit oormôre was, sál die lig deurbreek.
Vandag die laaste kardinale skryfles. En dié wat nie skryfaspirasies het nie, moet onthou dat skryf en die lewe meesal eenders werk. Wat jy insit, sal jy uitkry. Las daarby ‘n goedgesindheid teenoor dít wat jy skep, en jy kan seker wees van saamgestelde rente.
Toe ek so 19 was, sit ek eendag met my flenter tikmasjien in die son op oom Roelf se huurhuisie se stoep, agter die lawaaierige off sales van die Royal Hotel op Uniondale. Besig om gedigte te tik wat van my ‘n Elizabeth Eybers moes maak. Mos daardie armtyd gewees toe ek die sampioen-deeg geknie het. Die tikmasjien was gehawend en die e-toets oorlede. Ek moes die e’s met ‘n swart pen invul. Die lint was dof; die vyfgellingdrom waarop my skryfgereedskap uitgestal was, was wiekelrig en te laag vir my swanger lyf.
“Kom stap saam tot by die Ou Meul.”
Tannie Dalene Matthee wat hoek-om neffens Jozelle bly, staan by die tuinhekkie. My sielsma. Daardie middag, in die stilte by die Ou Meul, vra ek haar iets wat ek só graag wil weet. “Tannie, hoe kry mens dit reg om ‘n genuine skrywer te word? Kan Tannie my nie help nie?”
Hande saamgevat agter die rug, het sy lank loop en dink. “Nee, ek kan jou nie help nie. Daar’s een goue reël: It’s you and you alone.”
Daardie dag, in my skryfsoeke, het ek gedink sy’s selfsugtig. In ’99 is ek en die ou gryse een nag deur Uniondale op pad Kaap toe. Ek het hom by die Ou Meul laat stop. In die piknag het ek my hand op die waterwiel gesit en vir tannie Dalene dankie gesê.
Maar só is ek terug na my vyfgellindrom en e-lose tikmasjien. Die pakkie gedigte, vol pikswart e’s, is gepos na Petra Grutter wie se adres ek in ‘n tydskrif gekry het. Ek het nie geweet mens moet eers vra nie. Of in dubbelspasiëring tik, en nie op die voor- en agterkant van die papier nie. Of dat ek veronderstel is om ‘n gefrankeerde koevert te stuur nie. Tog, maande later het die gediggies teruggekom van Petra af. Geduldig met potlood gemerk. Iewers in ons trekkerye het die koevert weggeraak, en ek kan geen kommentaar onthou nie. Maar een ding het vasgesteek, en daaraan het ek verbete geklou.
Só het sy gesê: Skryf het twee hande. Met die een hand moet jy aanhou en aanhou skryf, sodat jy nie daardie waardevolle materiaal verpas nie. En met die ander hand moet jy leer hóé om te skryf.
Die dag in ’94 - bykans 20 jaar later - toe my eerste kortverhaal in Huisgenoot verskyn het, het ek my in die kerk op Bedford toegesluit en agter die orrel ingeskuif. Ek het Petra en Dalene se name hardop in die leë kerk gesê; toe die trompetterstop uitgetrek en gespeel: U het die brood gebreek, eens by die meer. Huilend, laggend, jubilate.
Wat goed was op daardie dag, was dat ek nie tóé wis watter eensame worstelpad skryf is nie. Hoeveel hel-ekstase ingeknie moet word voordat ‘n romanbrood begin rys. Skryf is nie romanties nie; dit het nie ‘n eksentrieke aura nie; dit maak jou nie geldryk nie. Maar tog, tog bring dit ‘n innerlike rykdom ver bokant die waarde van korale.
Daarmee dan, voor 1000de getuies: Dankie vir die 2 vroue wat my met die reëls toegerus het. En vir almal wat wil skryf (of voluit leef, want dis een en dieselfde ding): Gaan skryf die 4 sleutelwoorde waar jy dit nooit weer sal miskyk nie.
Van daar af is dit jy en jy alleen.

Dit is amper weer tyd vir ons volgende Volksdans Kamp vir Graad 5, 6 of 7 by die Voortrekker Monument

Plek vir 40 jeuglede op die kamp.
Wanneer: 11- 13 Januarie 2008.
Kostes: R200 per persoon

Inskrywingsvorms en verdere inligting beskikbaar by Hannetjie du Toit.
Sel: 084 652 8061
hannetjie.dutoit@sanlam4u.co.za

Met elke uitgawe fokus ek op 'n Afrikaanse webwerf.  
Hierdie keer Bravoland en die Bravolandvlag

Afrikaanse Lied

Iemand wat in Melbourne woonagtig is stuur vir my nou die dag die skakel na 'n webwerf wat Afrikaanse midi's op het asook die woorde van 'n hele klomp Afrikaanse volksliedere. Johann Lochner, die eienaar van die webwerf verleen toe goedgunstiglik toestemming dat ek van die woorde vir my nuusbrief kan gebruik. As julle self wil gaan kyk,klik op die skakel:
Ons Blêrkas van Afrikaanse Volksmusiek

KAMMALANDSE TANNIE

Woorde: Tradisioneel
Musiek: S.A. Volkswysie; verwerk: CHRIS LAMPRECHT

Veertien rooibontes die trek voor my wa,
sewe van my en sewe van my pa.
Die hot-op-vier die heet Napier
en die haar-op-vier die drink sy bier.

[REFREIN]
Kammaland se tannie met die vaalkuif haar,
stuur ons die toue van die bamboesblaar;
agter die wa is die ysterbriek,
voor by die tou loop die "swarte kriek".

Die hot-op-ses is 'n rooie met 'n bles,
die haar-op-ses die doen sy bes.
Die hot-op-ag die loop met mag
en die haar-op-ag die doen sy krag.

[REFREIN]
Kammaland se tannie met die vaalkuif haar,
stuur ons die toue van die bamboesblaar;
agter die wa is die ysterbriek,
voor by die tou loop die "swarte kriek".

Die hot-op-tien die loop en sien,
die haar-op-tien die trek miskien.
Die hot-op-twaalf is 'n ou koei se kalf
en die haar-op-twaalf het die strop om die hals.

[REFREIN]
Kammaland se tannie met die vaalkuif haar,
stuur ons die toue van die bamboesblaar;
agter die wa is die ysterbriek,
voor by die tou loop die "swarte kriek".

S.A. Volkswysie, soos opgeteken deur Chris Lamprecht by tant Miemie Gouws van Excelsior, O.V.S. 
Die teks en melodie uit "Dit kom van ver af" van Chris Lamprecht (Die Staatsdrukkery, Pretoria) en word 
gereproduseer ingevolge die Staatsdrukker se Outeursvergunning 62 47 van 14-7-1978.

Die Olifant as ete - deur Frik Lombaard

In my soeke het ek afgekom op ‘n boek geskryf deur Alexis Soyer (1809 –1859). In hierdie boek beskryf hy nogal in redelike detail die oorsprong van kos en hy gee ook ‘n paar resepte van hoe om sekere soorte voedsels gaar te maak. Graag sou ek van die resepte wou weergee maar die kruie en speserye wat hulle gebruik is onbekend en sal nie eintelik sin maak nie.
Die Amerikaners en veral die van Texas af is geneig om te dink dat alles groter en beter is by hulle. In die boek van Alexis Soyer word iets beskryf wat groter en beter is hier in Suid Afrika en dit is die gaarmaak van olifante. Die volgende beskrywing sal ek probeer vertaal in my beste Afrikaans.
Sekere nomadiese volke van Asia en Afrika word geglo om versot te wees op gebraaide olifante. Die Egiptenare het sover gegaan om hierdie delikatesse in die hande te kry dat Koning Ptolemy Philadelphus hulle verbied het deur streng wetgewing om olifante te jag. Dit het hulle egter nie afgesit nie. Al wat die wet veroorsaak het was dat die olifant se vleis nog ‘n groter aantrekkingskrag vir hulle gehad het.
In sekere barbaarse volke het hierdie smaak ook byval gevind. Le Valliant, ‘n gesoute reisiger vertel die eerste keer toe hy die eerste keer ‘n Olifant se slurp ge-eet het wat deur die Hottentotte aan hom voorgesit is. Hy het besluit dat dit nie die laaste keer is wat hy die vleis gaan eet nie aangesien dit die mees eksotiese smaak is. Sy voorliefde is egter vir die voet van die Olifant.
Le Valliant skryf soos volg:
Hulle sny die vier voete van die Olifant af. Daarna het hulle ‘n gat in die grond gemaak van ongeveer 3 vierkante voet. Hierdie gat is gevul met houtskool en bo die houtskool is droë hout gesit. Die vuur was heelaand aan die gang gehou. Wanneer die Hottentotte gedink het dat die gat warm genoeg is gedurende die nag, het hulle die gat leeg gemaak. Binne in die gat is die vier pote van die Olifant gesit. Die gat is gevul met warm as, houtskool en droë takke. Die vuur is aan die gang gehou tot die volgende oggend.
Hier skryf Le Valliant dat hy die volgende oggend deur sy bediendes bedien met vleis. Hy gaan aan om te beskryf dat nadat hy die reuk gekry het hy nie vinnig genoeg die vleis proe nie. Sy slot opmerking is dat hy nie kon verstaan dat ‘n dier so groot en lomp, so ‘n delikate en fyn voortbring nie. Hy noem ook dat die Hottentotte die ander dele van die dier ook gaargemaak en ge-eet het.
Dit is seker nie baie van ons se wens om gebraaide Olifant voet te eet nie. Maar dit is seker ‘n ondervinding wat nie baie gou vergeet sal word nie. Soos op die afgelope ATKV se kongres is daar ‘n krokodil gebraai. Hulle se nie hoe dit geproe het nie. Miskien sal ek eendag waagmoed kry om Olifant of Krokodil te eet. Miskien sal daardie moed kom wanneer ek ‘n bietjie baie van Noag sy wyn in het.

Wat's nuut op Kalie se Boeremusiek webwerf?! Ons het nou 'n eie domein - dis nou vir die wat nie die blad onlangs besoek het nie. Gaan loer gerus by http://kalie.boeremusiek.net

Hierdie webblad is spesifiek daarop toegespits om die: Versameling...Bewaring...en Uitbouing...van Boeremusiek aan te spreek.

Boeremusiek- Ons Kultuurerfenis

Ek hoor iemand nou die dag sê dat as iemand nog nie ‘n taal of musiek vorm aangeneem het nie, dan is hy nog nie ‘n mens nie! Ons beskou Boeremusiek as deel van die “Boerekultuur” omdat dit spontaan onder die Afrikaner ontstaan het met sy eiesoortige styl en wysies hoofsaaklik gespeel op die konsertina, traporrel, mondfluitjie en die viool.. Presies wanneer boeremusiek die lig gesien het, is nie so maklik om vas te stel nie. Daar is egter genoeg bewys dat dit reeds op die Groot Trek gespeel is. Daar moet in gedagte gehou word dat die plat plaat (78 opm), eers in 1899 ontwerp is en dat die eerste opnames van Boeremusiek eers in 1928 op die “Regal” etiket opgeneem is! Daarvandaan is dit maklik om die spoor van Boeremusiek te volg.

So het ons gedokumenteerde Boeremusiek begin.

Dit was dan ook ‘n uitgemaakte saak dat die onthaal by troues in die 18’e en begin 19’e eeu met Boeremusiek opgevrolik is en waar die mense sommer 'n week lank partytjie gehou het as gevolg van die lang afstande wat afgelê moes word! My oupagrootjie se broer – Rooi Albertus de Jager, was 'n konsertinaspeler wat op die meeste van hierdie troues in die Verre Noord Transvaal, (Limpopo), gespeel het.

Dit was in hierdie tyd wat die Soutpansberg- settees en -polka die lig gesien het. Sy broer Rooi Chris was weer deel van die Hooggekraal orkes. Oom Hannes Buitendach het hulle goed geken!

Dit is dan ons erfenis. Nou wat doen ons daarmee?! Is dit nie ons plig om dit te bewaar vir die wat na ons kom? Die feite sê vir ons daar is al minder musikante wat Boeremusiek speel en die jong mense wat dit wel speel slaan baie maal oor na ‘n ander musiek genre. So die taak is nie sò maklik nie maar dit maak ons net meer vasberade.
 

Agterpad Reisnotas - versamel deur Braham van Zyl

Ek luister mos een Saterdagoggend na Amoré Bekker op RSG waar sy 'n onderhoud voer met Braham van Zyl. Ek kontak hom toe en is nou op sy poslys, hier volg een van sy vertellings. Kontak hom gerus en vra om op sy poslys te kom. (Eposdres onderaan die artikel) Hy stuur 'n 'n gereelde nubrief uit.

KLAARSTROOM tot STEYTLERVILLE, agterpad langs
Danie Snyman van INCOPHO 4x4 in Kenridge het geskryf, en vertel soos volg:
“Ek het nou onlangs ‘n baie interessante agterpad gery. Dit begin by die R29 pad by Klaarstroom, aan die noordekant van die Meiringspoort, en loop al met die grondpad wat Willowmore toe gaan, noord van die Groot Swartberge langs. Draai by Vondeling stasie noord deur Soetendalspoort, verby die ou kerkie van Strydomsvlei, tot in die Brakfontein / Rietbron pad. Draai daar regs en ry noord van Blydeberg verby, tot by die N9. Indien die tyd dit toelaat, kan jy links draai om op die dorpie Rietbron 'n draai te gaan maak. Dis die enigste dorp in die wêreld met 'n springbok op die kerk se toring.”
“In Soetendalspoort is 'n 4x4 roete en heerlike kampplek. Indien jy nie 'n 4x4 het nie, sal die eienaar jou tot bo-op die berg neem om die groot vlakte na die noorde te bespied. Bel gerus vir Manie en Stefanie Karsten by 044-923 1872 of 082 561 4260 om te laat weet jy's op pad.”
By die N9 het Danie links gedraai en by die Beervleidam weer regs, en só is hy al in die loop van die Grootrivier af, deur privaatgrond, tot by die ou Fullarton stasietjie. Ons ander met gewone motorrygoed kan daar by die N9 regs draai en by Willowmore weer die Steytlerville pad vat om verder die Oos-Kaap in te ry. Daardie omgewing waar hy gery het, is volgens Danie 'n deel van ons mooi land wat toerismegewys baie afgeskeep word.

Skryf vir Braham en vra om op sy poslys geplaas te word en ontvang sy reisbeskrywings direk van hom af! e-pos : info@explore-sa.com

Volgende van die Vrouekeur webwerf:

Hierdie resep, wat kokkerotte uit Habikino City in Osaka uitgeroei het, is steeds net so doeltreffend en goedkoop, as tóé.

BESTANDDELE

250 g boorsuur-*poeier (boric acid)
200 g vars uie, sonder water verpulp en versap
20 g styselpoeier
25 g (5 t) poeiermelk
20 g koekmeel
30 g suiker

1. Meng alles saam in ’n plastiekbak.
2. Sprei ‘n ou koerant in die motorhuis of op jou stoep oop en gooi die nat mengsel vroeg in die aand daarop uit. Laat dit deur die nag staan.
3. Maak die volgende oggend vingernaelgrootte balletjies van die pasta wat jy op die koerant aantref.
4. Plaas die balletjies oral waar jy al kokkerotte gesien het, maar veral by die skottelgoedwasbak, by rioolopeninge en in jou kruidenierskaste.
5. Drie tot sewe dae later is daar geen kokkerot in jou huis oor nie. Wenk: Deel hierdie resep met jou bure. Só maak jy ‘n groter area kokkerotvry.

Belangrik om te weet*
Boorsuur (Boric Acid) en Boraks (Borax) is nie dieselfde ding nie. Boraks is Na2B4O7-10H2O en Boorsuur is H3BO3.
Boraks kan as plaasvervanger vir boorsuur in die resep gebruik word, maar is nie so 100 % doeltreffend soos boorsuur nie.

NB! Boraks is geheel en al taboe vir menslike gebruik. Daar word beweer dat die inname van 56 g boraks ’n volwassene se dood kan veroorsaak. Hou die balletjies wat as kokkerot-dehidreermiddel gestrooi word, buite bereik van kinders.

Dankie, L'Marie vir die volgende een:

DIT KAN ERGER WEES

'n Pa loop verby sy seun se kamer en tot sy stomme verbasing sien hy die bed is netjies opgemaak en die kamer is aan die kant.
Toe sien hy 'n koevert op die kussing.
Dis gerig aan "Pa".
Met beklemming om sy hart tel hy dit op, skeur dit oop en lees die briefie :
"Liewe Pa, dis met groot spyt en verdriet dat ek vir jou skryf. Ek moes wegloop saam met my nuwe meisie omdat ek nie met jou en Ma wou rusie maak nie. "Ek en Santie het ware passie ontdek. Sy is so oulik.
Ek weet julle keur haar nie goed nie, omdat daar so baie ringe deur haar lippe, neus en ander plekke is,
En sy vyf jaar ouer as ek is. Maar is nie net passie nie, Pa. Sy is swanger.
"Santie sê ons sal baie gelukkig wees. Sy het 'n woonwa wat iewers in 'n bos staan en daar is 'n hele hoop vuurmaakhout vir die winter. Ons wil sommer nog baie kinders hê. Santie het my ook geleer dat dagga nie net sleg is nie. Ons gaan sommer self 'n bietjie daarvan in die bos kweek en dit aan die ander Mense in die kommune verkoop. Dan kan ons met daardie geld ander, duurder drugs soos COKE koop. "Intussen hoop en bid ons dat die wetenskap 'n kuur vir VIGS vind sodat Santie gesond raak. Sy verdien dit !!!!!!!!
Moenie bekommerd wees nie, Pa. Ek is darem al Vyftien en kan na myself kyk.
Ontspan, en geniet die kleinkinders wat nog kom.
"Met liefde
"Jou seun
"Johan

"NS !!! Pa, niks hiervan is waar nie!!!! Ek is by Jannie.
Ek wou Pa maar net daaraan herinner daar is baie erger dinge in die lewe as 'n swak rapport.
Bel wanneer dit veilig is om huis toe te kom !!!!!"

Dankie aan Janice vir die een:

Klein seuntjie vra vir sy pa waar hy vandaan kom. Pa sê hulle het 'n klein saadjie op 'n warm plekkie gebêre, toe groei hy en toe kry hulle hom. Een dag loop die seuntjie in die tuin, tel saadjie op en sit dit onder die stoepmat in die son. Na 'n paar dae onthou hy en gaan lig die mat op. 'n Kriek spring uit en die seuntjie sê " Liefie, as ek nou nie geweet het jy is my kind nie, het ek jou wragtig doodgetrap!"
 

Laat jou wildste drome waar word, kry 'n kaartjie in die UK Lottery, klik net hier  Die boerpot is gereeld om en by  £11 miljoen, ( R140,000,000), sjoe, dis darem maar baie nulle!! Maar dis nog NIKS! Die Euromillions Lotto staan huidiglik op 181 miljoen Euro, dis om en by R1,719,500,000. Eishhhhhh. Vat 'n kans, wie weet???

Ek is betrokke by hierdie inisiatief van Elsabé, kyk tog asseblief of julle nie ook 'n bydrae kan maak nie, besoek ook hulle webwerf.   Lees asseblief die nuusbrief en kyk of jy kan help.

Bankbesonderhede:
Danville Hulp Projek
FNB - Brooklyn
Takkode:- 251 345
Tjek rek: 620 546 34128
Swiftkode: FIRNZAJJ926

Aflewerings adres:-

286 Cliffendale rylaan
Faerie Glen
Tel 012 991 3914 Sel 082 8282 551
E.pos - elecnet@mweb.co.za
Webwerf: www.danvillehulp.co.za
PS Bel asb voor jy ry.

Kumkwatkonfyt

1kg kumkwatte (2 pond)
1kg suiker (2 pond)
6 x 250 ml water

Maak klein snit in elke kumkwat en verwyder pitte. Plaas in kastrol, bedek met koue water, bring stadig tot kookpunt en kook tot sag genoeg om ‘n vuurhoutjie in te druk. Kook stroop van suiker en water en koel af. Dreineer vrugte en plaas in afgekoekde stroop. Bring weer baie stadig tot kookpunt en kook tot vrugte helder en stroop dik is. Laat oornag so staan en kook weer volgende dag voor dit in warm, gesteriliseerde bottles verpak en verseël word.

Lemoen-Marmelade

3 soet lemoene
1 lemmetjie of suurlemoen (met ‘n gladde skil)
water
wit suiker

Was vrugte en sny alle lelike mercies aan die skille af. Snipper die vrugte fyn en verwyder die pitte. Meet snippers en voeg 750 ml water by elke 250 ml snippers. Laat dit oornag staan. Verhit die mengsel die volgende dag en kook dit sowat 30 min lank tot goed sag. (Dit is sag genoeg wanneer ‘n vurk of vuurhoutjie maklik deur ‘n stukkie skil gedruk word.)

Meet weer die mengsel (snippers en vloeistof) en voeg 250 ml witsuiker by elke 250 ml snippers. Verhit dit in ‘n groot konfytkastrol tot kookpunt en roer net totdat die suiker gesmelt het. Kook die marmelade taamlik vinnig sonder ‘n deksel totdat die stroop dik is; voeg ‘n klontjie botter by as dit te veel skuim. Skuim die marmelade gereeld af as dit kook. Om vas te stel of die stroop dik genoeg is, skep ‘n bietjie in ‘n piering en verkoel dit vinnig in die vrieskas. Dit is dik genoeg wanneer dit plooitjies vorm as jy dit met jou vinger stoot. Skep warm in skoon gesteriliseerde flesse en verseël.

Waatlemoenkonfyt

Sny in skywe ongeveer 50mm breed, sny die sagte vleis uit en skil die groen skilletjie af. Prik elke skyf met ‘n vurk en sny dit in langwerpige of vierkantige stukke, soos verkies. Weeg. Laat week die waatlemoenskil oornag en makataanwaatlemoenskille 2 dae lank in die volgende oplossing. 2 eetlepels kalk per 3,5 liter water.

Dreineer, spoel af en laat 2 uur staan

Asyn Poeding (al lank en van my gunstelinge)

3 koppies meel
1 koppie suiker
3 teelepels gemmer
2 teelepels koeksoda
2 eiers
3 E appelkooskonfyt
½ t sout
1 koppie melk

Maak slap deeg aan. Gooi koeksoda laaste in. Bak in stroop.

Stroop:
4 koppies kookwater
1 ½ k suiker
¼ koppie asyn.

Suurlemoentert

2 eiers geskei
1 blik kondensmelk (125ml)
½ koppie suurlemoensap
50g strooisuiker
knippie kremetart

Skei eiers, voeg by kondensmelk en suurlemoensap.
Klop eierwitte, kremetart en strooisuiker styf. Gooi in tertkors.
Sit styfgeklopte eierwitte bo-op. Bak vir 10 min by 180°C. Los dan vir ½ uur in oond wat afgeskakel is.

Die een ken ek nie, maar klink heel interessant :-)

Tietiekoekies

1 koppie meel
1 teelepel bakpoeier
1 eier
knippie sout
melk om deeg mee aan te maak

Maag slap deeg aan en skep lepelsvol in warm olie. Bullybeef kan ook bygevoeg word.

Hierdie een kan net lekker wees:

Vleis in ‘n degie

Beslag: 250 ml bruismeel
knippie sout
150 ml koue water
12,5 ml olie
2 eierwitte

500 gram varkboud, in blokkies gesny
sout en peper na smaak
olie om in te braai

Sif die bruismeel en sout saam. Meng die water en olie en voeg by die droë bestandele. Meng tot ‘n gladde beslag gevorm is. Laat 1 uur staan. Klits die eierwitte styf net voor bedizening en vou in. Geur die vleisblokkies met sout en peper en doop in die beslag. Braai in diep olie tot goudbruin. Dreineer op handdoekpapier. Dien saam met rys op.

Flige gif: 1 ons peper, 1 ons Quassia (by 'n Apotheek te kry), 2 ons suker, maak in fyn poeier alles te same en strooi

st se  pitkos

Klik hier om st se webwerf te besoek
en om in te teken op sy weeklikse nuusbrief

“Die weeklikse nuusbriewe van Dr Potgieter is my dosis lewens vitamiene en het weer kleur en motivering vir my lewe gegee” – ‘n leser.

Nog gevleuelde woorde van ST: